No.2387/2021-2022

Aizawl the 29th September, 2021: Vawiin chawhma dar 10:30 khan Zaingen YMA Hall, Khawzawlah 22-Tuichang Assembly Constituency huamchhunga Booth Level Officer-te tan Special Summary Revision of Photo Electoral Rolls (SSR), 2022 chungchang inzirtirna Training buatsaih a ni a, he hun hi Pu C.C. Lalchhuangkima, District Election Officer leh Deputy Commissioner ni bawk chuan khuallian niin a hmanpui a ni.

Pu James Lalnithanga, SDO (Sadar) leh ERO kaihhruai training-ah hian Pu C.C. Lalchhuangkima chuan thu sawiin, BLO te chu Electoral Roll felfai leh dik neih theihna tura thawktu pawimawh tak an ni a, Electoral Roll a felfai loh chuan Election felfai tak a neih theih loh avangin an mawhphurhna a sang hle a ni, a ti a. Election kaihhnawihah thil thar a awm reng avangin BLO te pawh rilru inhawng taka training ngaithla a, intuaithar fo thin turin a chah a ni.

Pu H. Lalramenga, Election Officer, Khawzawl District-in SSR, 2022 chungchanga hriattur pawimawh zualte tarlangin, January ni 1, 2004 leh a hmalama piang chinte Electoral Roll-ah an lut thei dawn tih a sawi a. Claims & Objections thehluh hun chhung chu November thla chhung tih ni mahse, form lutte chinfel nan hun a bichilh dawn avangin November thla tawp hmaa hearing neih a ngai dawn tih sawiin, Election Commission of India duhdan angin form tam thei ang ber Garuda Application kaltlanga thehlut turin a chah bawk.

Vawiina BLO Training-ah hian Dr. Saithangpuia, BDO, Khawzawl RD Block leh AERO chuan Voter Helpline Application chungchang zirtirna Powerpoint presentation hmangin a pe a. Pu Lalrinawma Kholhring, Data Entry Operator in Garuda App chungchang zirtirna pein, BLO te chu Garuda app hmanga dilna form rawn lutte buaipui dan tihchhintir an ni bawk a ni.

Training-ah hian Tuichang Assembly Constituency huamchhunga BLO 27 telin, anni bakah hian Champhai North AC atangin Rabung, Neihdawn leh Aiduzawl BLO ten training hi an chhim bawk a ni.