4801/2025-2026

Dated Khawzawl, 12th March, 2026: Vawiin chawhnu dar 1 khan DC Conference Hall, Khawzawlah Chief Minister Special Package Phase-II semna leh training neih a ni a, Khawzawl Bawrhsap, Pu K. Vanlalthiana’n hmanpuiin, Certificate leh Placard semna a nei nghal a ni.

Bawrhsap, Pu K. Vanlalthiana chuan thu sawiin progress partner te chu thinlung taka a lawmpui thu leh thlen chin zela hmasawn a pawimawh zia a sawi a. Sorkarin duhsak taka hmasawnna atana thawhpui tura a thlanchhuahte an nih angin a nihna ang taka hmang turin kalkhawmte chu a chah a ni. Hlawhtlinpui tuma, dik taka hmang tan chuan dinchhuahpui theih tura sorkarin a ruahman a nih avangin he hun hi kal leh zelna tur atana rahbi pawimawh tak a nih ngei a beisei thu a sawi, chhungkua, khawtlang leh ram tana hmasawnna a nih ngei theih a beisei thu a sawi bawk a ni. Sum an hmanna kawngah leh an hmasawn danah pawh Line Department te’n an enpui zel dawn a ni a ti.

Sub-Deputy Commissioner, Pu Lalrinhlua chuan report pein CM Special Package hi  Department panga (5) - Agriculture, AH & Vety, Commerce & Industry, Horticulture leh Fisheries Department atang tein progress partner mi 102 in an dawng a ni. Book keeping & financial literacy tih thupui hmangin Pu F. Malsawmtluanga, Rural Accounts Officer, DRDO in technical training a pe a, Certificate leh Placard semna hun hman a ni bawk a, Pu K. Zorammuana, Addl. DC in lawmthu sawina hun hmangin he hun hi a khar a ni.