No.44/2019-2020

Nimin April Ni 1, 2020 khan Khawzawl DC Office Complex-ah Covid-19 hrileng laka invenna leh enkawl ngaite enkawlna tur hmanraw lo thlengte semchhuahna hun hman a ni. Deputy Chief Minister leh 22-Tuichnag A/C bialtu MLA Pu Tawnluia hmalaknaa hmanraw lo thleng tharte hi Khawzawl District leh 22-Tuichang A/C chhunga Damdawi In leh Village Level Task Force-te hnenah sem chhuah a ni.

He hun District Bawrhsap leh Chairman, District Level Task Force nibawk Pu H.Lianzela kaihhruaiah hian Addl DC Pu Paul L.Khuma hnen atangin District Level Task Force hmalakna hrang hrangte ngaihthlak a ni a. Pu Paul L.Khuma chuan Khawzawl District-ah Quarantine Facilities 11 a awm thu leh heng zinga 4 te chu Khawzawl khawpui chhunga awm anih thu a sawi a.

He hunah hian Khawzawl Damdawi In-a Medical Officer Dr. Lalngaihawmi Chhangte chuan Khawzawl district chhungah Home Quarantine 187 an awm mek thu leh sample pahnih thawnte an negative thu a sawi a. Khawzawl Damdawiinah Covid-19 awm palh pawha enkawlna tur bik Isolation Ward khum 10 awmna peihfel anih tawh thu a sawi bawk.

Pi K.Ramdingliani, President, Sub-Hqtrs MHIP Khawzawl-in Sub Divisional Agriculture Office Khawzawl aiawhin Chairman, District Level Task Force hnenah tanpuina Rs 5,000/- a hlan hnuah lawmthu sawiin hun a khar a ni.

He hunah hian DLTF member-te, VLTF Chairman theuhte, Medical Officer-te leh khawtlang hruaitute an tel a ni. DLTF, Medical Officer - Khawzawl Hospital, Sialhawk PHC, Rabung PHC, Biate PHC, Kawlkulh PHC leh Khawzawl District-a Village Level Task Force-te hnenah Covid-19 dona atana hman tur Mask, Glove, Shoe Cover, Hand Sanitizer, Bleaching Powder leh pawisa fai sem a ni a. Heng bakah hian Sialhawk PHC Isolation Ward thawmthatna tur Rs 15,000/- leh Deputy Chief Minister hmalakna kaltlanga buhfai semna tur pawisa fai hlanna neih nghal a ni bawk.

Hun hman zawh hnu hian District Level Task Force (DLTF) chu thukhawm zui nghalin, Khawzawl khawchhunga Dawr awmte khar zui zel nise an ti a. Village Level Task Force te’n chhung tin ei leh bar  mamawh  zawtchhuakin  mamawh an neihte Dawr hrang hrang atangin an lakhawm anga, intinah an sem tawh ang  tih a ni a. Khawzawl khawpui pawna khaw tin VLTF te chuan an mamawh angte DC Office-a  an thlen hnuah DLTF leh Dawrkai te’n ruahmanna lo siampui  thin nise ti a rel a ni a. Dawrkai lian te’n  nitin   mamawh ang chi bungrua an  neih dan kimchang Daily Stock Position DC Office-ah  hriattir thin se  tih a ni bawk. DLTF chuan mitinte chu sawrkar leh khawtlang hruaitute thu zawm a, Covid-19 natna hneh ngei theihna tura theihtawp chhuah tura chahin,  tul tawp khawk lovah chuan tumah pawn chhuak lo tur leh zinchhuak rih lo  turin a ngen nghal  a ni.