No.6483/2020-2021   

Dated Khawzawl, the 9th November, 2020:  Tun thla November Ni 30, 2020 thlenga COVID-19 No Tolerance Fortnight pawhsei kalpui tura Khawzawl khawpui chhunga hmalak dan tur chu vawiin chawhnu dar 2:00 khan Khawzawl DC Pu Zothanmawia hovin Khawzawl DC Conference Hall-ah ngaihtuah a ni a. He hunah hian  Khawzawl District chhunga Zone Leader-te leh Khawzawl khawpui chhunga VLTF hruaitute an tel a ni.

He hunah hian Khawzawl DC Pu Zothanmawia chuan COVID-19 No Tolerance  Fortnight kalpui mek chu thih leh dam kaihhnawih anih vangin ngaih pawimawh a tula, mawhphur tura ruat Sawrkar hnathawkte pawh thahnemngai taka  thawk turin a duh tih a sawi a. VLTF hruaitute pawh tlawmngai taka Duty zui zel tura ngenin khaw neitu leh khawtlang mipuite hretu an nih avangin anmahni tel lo chuan hmalakna engmah a kal thei tak tak lo tih a sawi a ni.

Vawiin Meeting hian COVID-19 No Tolerance kalpui chhunzawm turah khauh takin Duty zui zel nise an ti a, hmalakna a a chak zawk theihna turin Executive Duty-ah zirtirtu tam zawk ruat nise an ti a, hei bakah hian remchan zawkna vangin Zone Leader thenkhat thlak turin thutlukna siam a ni bawk.

COVID-19 No Tolerance Fortnight, October Ni 26, 2020 atanga November Ni 9,2020 chhunga hmanah Khawzawl District huamchhungah Dan bawhchhia mi 534 man an ni a, an pawisa chawi tlingkhawm hi Rs.47,700/- a ni.