3547/2024-2025

Khawzawl, dated 16th December 2024: Vawiin khan Khawzawl District Consultative Committee, District Level Review Committee leh District Level Security Committee chu Khawzawl DC leh Chairman ni bawk, Pu K. Vanlalthiana hovin DC Conference Hall-ah meeting an nei.

Chairman Pu K. Vanlalthiana chuan bank hrang hrangte chu an thawk tha tih sawiin anmahni hlawkna chauh ngaihtuah lo tur leh mipuite tana an theih chin chin a luangchhuak zel turin a chah a. A bik takin mipuiten awlsam zawka Loan an lak theihna tur leh hamthatna an neih ang angte hrilhhriatna turin Financial Literally Campaign (FLC) chak taka kalpui a tul hle a ti a, hemi kawngah hian tul dan ang a sawrkar line department hrang hrangte nena thawkho thiam turin a chah. 

Vawiin meeting-ah hian Kum 2024 chhung a Khawzawl District a bank hrang hrangte performance thlir ho niin, sawrkar scheme leh loan hrang hrangte dik taka kalpui a ni em tihte enfiah a sawi ho a ni. Security tha lehzual neihdan tur te, bank ten tun dinhmunah cash an neihdan te leh sawrkar scheme hrang hrang credit linkage-te sawiho niin, harsatna hrang hrang an tawh thinte chu chak zawk a hmalak a sutkian a nih theihdan tur sawi ho a ni. Meeting-ah hian Jan Suraksha Saturation Campaign, PMEGP Annual Target 2024-2025, Annual Credit Plan 2024-2025 chungchangte sawi ho a thlir ho bawk a ni.

Vawiin meeting-ah hian Regional Office, NABARD-ten Khawzawl District tan a an  buatsaih Potential Linked Credit Plan, 2025-26 chu DC Pu K Vanlalthiana'n a tlangzarh bawk a ni.

Meeting-ah hian Lead District Manager Pu Lawmkima te, General Manager, Reserve Bank of India te, Khawzawl District chhunga Bank hrang hrang aiawh leh sawrkar line department hrang hrang aiawhte an tel a ni.