No.2170/2021-2022
Aizawl, the 9th September, 2021: Vawiin chawhma dar 11:00 khan District Level Standing Committee (DLSC), Khawzawl District chu an Chairman Pu C.C. Lalchhuangkima, District Election Officer, District Bawrhsap ni bawk hovin DC Office Conference Hall-ah an thukhawm a, Special Summary Revision of Photo Electoral Rolls (SSR), 2022 atana Polling Station thlak ngai chungchang an sawiho.

District Election Officer Pu C.C. Lalchhuangkima chuan India ram chu mipui aiawh tur ram hruaitu thlang thin kan nih avangin inthlanna kalphung dik leh felfai neih a pawimawh hle a, chumi atana pawimawh ber pakhat chu Electoral Roll dik leh tha neih hi a ni, a ti a. Electoral Roll felfai leh rintlak a awm theih nan an hma zawn theuha theihtawp chhuah turin member tinte a sawm a ni.

Pu H. Lalramenga, Election Officer leh AERO in a tarlan danin Khawzawl District Election Officer hnuaiah 22-Tuichang Assembly Constituency awmin, Polling Station 28 a awm mek a, heng zinga 13 te hi Urban Area-ah awmin, Rural Area-ah Polling Station 15 a awm thung a ni. District Election Officer kaihhruaina hnuaiah Electoral Registration Officer (ERO) pakhat, Assistant Electoral Registration Officer (AERO) pahnih leh Booth Level Officer (BLO) 28 ten 22-Tuichang Assembly Constituency hi an vil mek a ni.

DLSC meeting-ah hian Polling Station thlak chungchanga Booth Level Officer atanga rawtna thehluhte thlirho a ni a. Khawzawl Vengthar South Polling Station hman lai chu Sawrkar Office (Samagra Shiksha) atan hman a nih tak avangin Govt. Primary School-II a thlak nise tih leh, Khawzawl Zaingen Venga Polling Station building hming chu Sawrkarin a thlak tawh angin, Govt. PS-III atangin Govt. PS-I tiin thlak nise tihte chu sawiho a nih hnuah pawm a ni a, thuneitu sang zawkah pawmpui tura thawn a ni ang. Meeting-ah hian Systematic Voters Education and Electoral Participation (SVEEP) kaltlanga Election kalphung leh Electoral Roll Revision chungchang mipui hnena zau zawka thehdarh dan turte sawiho a ni bawk

He hunah hian Election Commission of India (ECI) dundan hrang hrangte ngaihthlaka zirho a ni bawk a. Polling Station pakhatah Elector 1,500 aia tam an awm tur a ni lo tih leh, vote thlak tur Elector-te chenna atanga kilometre hnih aia hlaah vote thlakna hmun Polling Station a awm tur a ni lo tihte, Polling Station atana hman building neitu chu Political Party behchhan nei a ni tur a ni lo tihte bakah, tui leh eng, inthiarna leh Assured Minimum Facility dangte a awm tha tur a ni tihte tarlan a ni.

Vawiin meeting-ah hian Pu P.C. Lalchunglura MPS, Superintendent of Police, Pu James Lalnithanga MCS, ERO, Dr. Saithangpuia MCS, AERO te bakah District Education Officer, Political Party hrang hrang, MJA, YMA, MHIP leh MUP aiawhte an tel a ni.