No.2483/2021-2022
Aizawl the 5th October, 2021: Vawiin khan Multipurpose Hall, Government Khawzawl College-ah District Election Office leh Department of Political Science, Govt. Khawzawl College tangkawp buatsaihin ‘National Seminar on Electoral Literacy and Participation’ buatsaih a ni a. He hun hi Pu C.C. Lalchhuangkima, District Election Officer, Khawzawl District, Deputy Commissioner ni bawk chuan Khuallian niin a hmanpui.

Seminar hawnna hun Pi Lalthlamuani, HOD, Department of Political Science, Government Khawzawl College kaihhruaiah Pu C.C. Lalchhuangkima chuan thu sawiin, Democracy rama thil pawimawh tak Election chungchang inzirtirna seminar Khawzawla buatsaih a ni chu thil lawmawm tak a ni, a ti a. India ram Election kalphung chu rintlak leh belhchian dawl, khawvel ramdangte pawhin an entawn a nih thu a sawi a. Miin Election kaihhnawiha hriattur pawimawhte a hriatchian loh chuan thu lengvak tam tak lakah a him loh phah thin a ni, a ti a. Mizoramah chuan inthlan dawnah Sawrkar leh NGO, a bikin Mizoram People’s Forum (MPF) te thawhhona a that thin avangin India ramah pawh inthlanna felfai, mipui nungchang thatna leh uchuak taka sum hman pawh tlemna hmun a ni, a ti bawk.

Pu H. Lalramenga, Election Officer pawhin thu sawiin, Electoral Literacy chu ram hnuk khawih pha leh ram inrelbawlna nghawng a ni, a ti a. Mipuiin Election kaihhnawiha hriat tur pawimawhte kan hriatchian a, kan inrawlh tam poh leh Democracy a chak thin a ni tih sawiin, zirlaite chu Electoral Roll-a an inziahluh theih ve leh inziaklut tur leh, Election a awm leh huna vote thlak ngei turin a chah bawk a ni.

Seminar hawnna hunah hian Pu R. Lalrintluanga, Principal, Government Khawzawl College in kalkhawmte lawmna thu a sawi a, Pu K. Lalkulhpuia, Assistant Professor & Co-Ordinator in inhmelhriattirna hun a hmang bawk a ni.

National Seminar on Electoral Literacy and Participation buatsaihah hian Govt. Khawzawl College bakah Govt. Champhai College leh Govt. Saitual College atanga Resource Person sawm bik ten a hnuaia Electoral Literacy kaihhnawih theme hrang hrang pasarih (7) ahte hian zirtirna an pe a ni:

1) Theme-I : Significance of Electoral Literacy for a Stronger Democracy
2) Theme- II : Electoral Participation in Mizoram: An Overview
3) Theme-III : Social Media: A medium of Political Participation
4) Theme-IV : A comparative Study of Mizoram: Electoral Participation in Mizoram Legislative Assembly and Lok Sabha Elections since 1970
5) Theme-V : A study of Pre-Colonial to Post-Colonial Mizo Society with Special Reference to the Evolution of System of Government
6) Theme-VI : Electoral Literacy: A historical Study of Elections in India with Special Reference to Mizoram Politics (1954-1987)
7) Theme-VII : Significance of Electoral Literacy to form the Right Government.

Vawiin Seminar-ah hian Khawzawl Town chhunga Booth Level Officer (BLO) te, Sub-Headquarters YMA, Khawzawl aiawhte leh Mizoram Journalist Association member-te an tel a ni.