No.1928/2020-2021

Khawzawl, the 11th June, 2020 : Vawiin chawhma dar 11 khan Khawzawl District-ah Environment Forests & Climate Change Department leh KVK Khawzawl bultumin Green Mizoram Day chu KVK Khawzawl Complex-ah hman a ni.

He hunah hian DFO Khawzawl Wildlife Division Pu PC Lalchhandama chuan Green Mizoram Day chu Khawzawlah kum 2011 atangin mumal taka hman tan a ni tiin, kum 2011 atanga nikum 2019 thleng khan thingtiak 2481 phun tawhin thingtiak 26,115 an sem chhuak tawh tih a sawi a. Hripui leng mek vangin Green Mizoram Day hi hman loh nise tiin an rel hman thu leh hmang tura engkim peihfel anih tawh avangin thulh lovin, sawm bik mi tlemte nen an hmang ta zawk tih a sawi tel bawk.

Pu PC Rosiama, Hononary Wildlife Warden pawhin thu sawiin, ramngaw leh nungchate kan tihchereu hian Life Cycle a buai a, chhiatna rapthlak takin khawvel a la tibuai dawn chauh a ni, a ti a. Tuna hripui leng mek pawh hi kan Environment tihchhiat nghawng chhuak a ni tih sawiin, kum 1992 a Brazil khawpuia Earth Summit-ah khan Environment kan tih chhiat zel avangin khawvelin reiloteah chhiatna rapthlak tak ala hmachhawn dawn a ni tih hi an lo puang lawk daih tawh tih a sawi a. Ramngaw leh nungcha humhalh chu khawvel damkhawchhuahna awmchhun a ni tiin, a awmsate kan humhalh bakah kan phun belh zel a tul a ni, a ti bawk.

He hunah sawm bik ten thu an sawi hnuah KVK Khawzawl Head & Senior Scientist Dr. Henry Saplalrinliana chuan lawmthu sawina neiin inkhawm a titawp a ni. Green Mizoram Day puala inkhawm tawi neih zawh hian thingphun hnatlang an nei zui nghal a. Vawiin Green Mizoram Day pual hian KVK Complex-ah hian thing tiak 220 phun a ni a. Sawrkar Department hrang hrang ten thing tiak hi Forest Department atangin an la a, DC Office in 40, Agriculture department in 30, I&PR department in 13, AH&Vety department in 10 leh 2nd IR Battalion in 70, avaiin 163, anmahni ram theuhah an phun hlawm a ni.