762/2022-2023
Khawzawl, the 3rd June, 2022: Vawiin khan Khawzawl District Disaster Management Authority bultumin Khawzawl Electric Veng YMA Hall-ah kangmei laka invendan inzirtirna 'Seminar on Fire Safety Sensitization' buatsaih a ni a, he hun hi Pu C.C. Lalchhuangkima, Deputy Commissioner, Khawzawl chuan khuallian niin a telpui a ni.

Khuallian Pu C.C. Lalchhuangkima chuan thusawiin, kangmei laka inven hi mitin mawhphurhna a nih thu a sawi a. Seminar chu fur intan hnuah neih nimahsela, kangmei chu engtik hunah pawh chhuak thei reng a nih avangin kangmei laka fimkhur tura inzirtirna neih chu a tul reng a ni, a ti. Kalkhawmte chu an an thil zir leh hriatte thahnemngai taka midangte hnena puang chhuak thin turin a sawm bawk a ni.

Seminar-ah hian 'Kangmei laka i him theih nan fimkhur rawh' tih chu thupuiah hman a ni a. Zirtirna pe turin mithiam 4 (pali) sawm an ni a. Pu PC Lalchunglura, SP, Pu Ruatsanga Ralte, Commandant, 2nd IR Batallion, Pu K. Duhsanga E.E. P&E leh Pu PC Vanlalhlupuia, Zuchhip Veng ten zirtirna an pe a ni. Seminar hi Pu James Lalnithanga, SDO (Sadar) in a kaihruai a, Pu Lalringliana, Addl. SP in lawmthu sawiin hun a khar a ni.

Fire Safety Sensitization Seminar-ah hian Khawzawl District huam chhunga VC leh YMA Branch hrang hrang aiawhte an kalkhawm a ni.