No.7474/2020-2021 

Mizoram hmun dangte rualin Kangmei Ven Hapta, February Ni 8-13, 2021 chhung awh tur chu vawiin khan Zaingen YMA Hall, Khawzawlah hawn a ni. He hun hi Khawzawl District Bawrhsap Pu Zothanmawia chuan Khuallian ni a hmanpuiin Kangmei Ven Hapta 2021, Khawzawl District chu a hawng a ni.

Khuallian chuan hun kal tawhah kangmei chhuak vangin in leh lo leh nunna tam tak Mizoramin kan chan tawh thin dante a sawi a. Khaw hlun leh khaw changkang a piangin an khaw daiah ram ngaw humhalh, Safety Reserve, Supply Reserve, Tuikhur hnar Reserve tha takte an neih thin thu a sawi a, hei hian sik leh sa pawh a vawng thin ani, a ti a. Ramkangin thing leh mau mai bakah nungchate thlenga a tihrem thu leh nungcha leh mihringte chu inkungkaih tlat kan nih avangin ram tikangtute chungah dan anga hremna lekkawh zel anih tur thu a sawi bawk.

Pu Zothanmawia chuan Lo leh huan hal tur reng rengte chu meikawng/ meilam tha taka sial zel turin a chah a. Khaw hrang hrangte chu theihtawp chhuaha kangmei ven kawnga hma la tura chahin, kangmei veng tha inelna pakhatna nih theuh tum tur leh District inelna huanga ti tha ber pakhatna nih tum tura tanrual puiah District mipuite a sawm a. In leh lo te kangmei laka a him nante, ram lamah pawh kangmei a chhuah loh nan buh leh thlai chinna tur vah chin chiah hal tura meilam/ meikawngte sial tha turin kalkhawmte a chah a ni.

Pu C. Lalthankima, DFO (WL) & Member Secretary, District Level Committee on Fire Prevention chuan report a pe a. Kum 2000 atangin Fire Prevention Committee  din anih thu leh 2009 atanga District inelna leh District chhunga khuate inelna siam anih thute a sawi a. Hripui leng avangin nikumah lawmman siam a nih loh thu sawiin, kuminah erawh kangmei ven lawmman siam a ni dawn a ni, a ti a. Khaw hrang hrang VC-te chu lawmman la thei ngei tura tan la tur leh District inelna huanga lawmman la ngei thei tura tanla tura ngenin a chah a ni.

Pu PC. Rosiama, Honorary Wildlife Warden, Undivided Champhai chuan kangmeiin khawvel sik leh sa a tichhiat nasat ziate a tarlang a. Kum 2020 chhunga kangmei chhuak rapthlak zual ramte - Amazon (Brazil), Australia leh California (USA) chungchangte sawiin, kangmei chhuak te'n khawvel boruak a tihchhiat dante a sawifiah bawk a. Mizorama  boruak ti bawlhhlawha kangmei chhuahna chhan bulpui ber chu  lo neihdan kalhmang Shifting Cultivation vang leh kan inthlahdah vang a nih thu a sawi bawk. Ram tam tak tikang lo zawnga hmala tur chuan kumina kan lo neihte hi kum 2-3 tal rin theih dan ngaihtuah nise, ramkang leh boruak chhia kan tihchhuah hi a tlem sawtin a rinawm a ni, a ti bawk.

He hun hi Pu K. Thangliana, Jt. VC Chairman, Khawzawl chuan kaihhruaiin kalkhawmte lawmna thu a sawi a. Pu Lalringluaia Pachuau, Addl. SP,  Khawzawl-in Powerpoint presentation hmangin mipuite hnenah kangmei ti chhuaklo tura tihturte, kangmei a lo chhuah pawha inven leh chetlak dan turte a hrilhfiah a. Pu James Lalnithanga, SDO (Sadar) &  DUDO Khawzawlin lawmthu sawiin Kangmei Ven Hapta hawnna hun hi a khar a ni.

Vawiin Kangmei Ven Hapta hawnna hunah hian Khawzawl khawchhunga Head of Office hrang hrangte, khaw hrang hrang VCP leh an aiawh lo kalte leh NGO hrang hrang hruaitute an tel a ni.