650/2022-2023
Khawzawl 26th. May, 2022: SIRD & PR, MYC leh District Skill Committee, Khawzawl tangkawpin Cement Mistiri Training, tun thla ni 12 atanga an buatsaih chu vawiin khan zawhfel a ni ta a, Training-ah hian mi 40 telin heng mite hi Khawzawl khawchhung atangin mi 20 leh khaw pawn atangin mi 20 an ni a, an vai hian a tir atanga atawp thlengin an tel tluan vek a ni.
Vawiin tlai dar 3:30 khan Training kharna pualin inkhawm tawi buatsaih a ni a. He hun hi SDC Pu Obed Lalmalsawma chuan kaihruaiin District Bawrhsap Pu C.C. Lalchhuangkima chu khuallian a ni.
Khuallian chuan Cement Mistiri Training buatsaihah diltu mi 100 chuang an awm thu leh Training a mi 40 an tel tluan thei chu lawmawm a tih thu a sawi a. Mistiri training a tel te chu an thiamna upbo mai lovin an hnathawhnaah te lantir turin a chah a. Mizoram-ah hian thalai lamin inhlawhna tur an nei lo kan tih laiin hnamdang Mistiri ringawt mi singnga atanga singkua vel lai an awm tih a sawi a. Mizoram Youth Commission chuan Mizo thalaiten eizawnna an neih theihna turin Cement Mistiri Training hi a buatsaih ta tih sawiin, District thenkhatah training a tel mi 20 vel chauh te an awm laia Khawzawl District-ah mi 40 lai an tel tluan thei chu lawmawm a tih thu a sawi a ni.
Pu C.C. Lalchhuangkima chuan Mizo Mistiri te kuthnu hi hnamdang Mistiri te kuthnu aiin a mam lo zawk tih sawi a awm fo thin tih sawiin Cement Mistiri Training a telte chu an kuthnu ti mam a, an hnathawh uluk turin a chah a. Mizote hi thil inhrilh chhawng zel kan nih avangin an hna a that phawt chuan nakinah inhlawhna tur an hmu zel dawn a ni a ti a. An hnathawhnaah rinawm leh rintlak ni tura chahin eng hna pawh thawk se an hnathawh uluk a, an hnathawhna te mitmei veng thiam leh mittlung a hnathawh tum turin a chah a. Mizo Mistiri te hna thawh a that a, a neitute mit a tlung a nih chuan hnamdang Mistiri te hi tlem tlemin kan luahlan thei dawn a, hei hi YMA kumpuan Ram leh Hnam humhalhna tih hlawhtlinna pakhat a ni thei dawn a ni a ti.
Vawiin Training kharnaah hian SIRD Trainers Er. Lalroliana Tochhawng chuan Technical Report pe in training an neih dan tlangpuite a tarlang a. SIRD & PR aiawha thu sawitu Er. C. Lalthlansanga chuan Khawzawl District chu District thar a nih avangin training hi an ngaih pawimawh bik thu leh kumin February thlaah pawh training hi buatsaih alo ni tawh tih sawiin tun tum training bikah hian Skill Development Committee, Khawzawl nena thawhhona tha tak an nei thei chu lawmawm a tih thu a sawi a ni.
Cement Mistiri Training a telte hnenah hian an hnathawhna tur hmanraw hrang hrang bakah TA/DA Rs.5,500/- leh Certificate te hlan vek an ni a, hengte hi D.C. Pu C.C. Lalchhuangkima leh SDC Pu Obed Lalmalsawma ten training-a telte hnenah hian an hlan a ni.
Attachment
- Loading attachment...
