3642/2022-2023
Dated Khawzawl, the 20th February, 2023: Vawiin chawhma dar 10:30 khan Khawzawl DC Conference Hall-ah Mizoram State Day 2023 lawmna hun District Bawrhsap Pu C.C. Lalchhuangkima hovin urhsun taka hman a ni.

Khuallian Pu C.C. Lalchhuangkima chuan State thenkhatah hnam hlawm lian tak tak, mizo mipui aia tam daih, State neih chak tak tak leh nei si lo an awm laia mi hmasate inpekna leh thawhrimna avanga State puitlinga Mizoram hlankai a ni leh, mahnia ro inrel theia a awm chu ropui a tih thu a sawi a. Tuimal far te te in tuipui lian a siam angin mimal tin thiltih that tlingkhawm avangin state nuam tak kan siam thei a, State muanawm leh nuam siam zel turin mimal tinin mawhphurhna kan nei vek a ni, a ti.

Khuallian chuan sawi chhunzawmin, kum 1990 hma lam ngaihtuahin Mizoramin hma a sawn nasat thu sawiin, ei leh bar kawngah awlsamna kan nei a, inkalpawhna kawngpui tha kan neih zel avangin kan ram hian hma a sawn zel ang tih a rinawm a, hmasawnna kan neih zel theih nan ram mipuiten kan theihna zawn theuhah thahnemngaih kan chhuah a ngai a ni, a ti a. State nih hnuah mahnia ro inrela hmasawnna lam pan zel a ni chu lawmawm a tih thu sawiin, State kan nih hnu kum 36 chhung hian Mizoramin hma a sawn hle a, hmasawn turin mimal tinte leh Office tin te, Sawrkar hnathawk leh mipuite kan zavaiin kan pawimawh tlang vek a ni, a ti a. Khuallian chuan ram leh hnam hmasawn leh changkang ni tura theihtawp chhuah puiah District mipuite a sawm nghal bawk a ni.

He hun hi Pu James Lalnithanga, SDO (S) Khawzawl chuan kaihruaiin kalkhawmte lawmna thu a sawi a. Pu K.Roliana, President, MUP Khawzawl District-in hunserh a hmang a. Pu K.Lalnunsanga, President, Sub-Headquarters YMA Khawzawl leh Pu K.Vanlalsiama, Chairman, Khawzawl Joint Village Council ten thu an sawi bawk a. He huna kal Prominent Citizen ten thu an sawi bawk a. Ram buai hma leh hnua Khawzawl khaw lo in din dante leh State nih hnu thlenga Khawzawl-in hma a sawn chhoh dante ngaihnawm takin an sawi a. Pu Vantlangkhuma, Superintendent, DC Office-in lawmthu sawiin hun a khar a ni.

Khawzawla Mizoram State Day 2023 lawmna hunah hian Head of Office-te, Sub-Headquarters NGO leh Political Party hruaitute an tel a ni.