1660/2025-2026

Khawzawl, dated 14th August 2025: Nimin khan Nasha Mukt Bharat Abhiyan (NMBA) vawi 5-na pualin zingah khan kawngzawh (walkathon) buatsaih a ni a, chawhnu khan Zaingen YMA Hall-ah lawmna hun hman a ni bawk.

Walkathon hi zing dar 6:30 khan neih a ni a, he hunah hian Khawzawl chhunga school hrang hrang atangin zirlai naupangte leh zirtirtute bakah Khawzawl district NMBA hruaitute leh DC staffs te an tel a, he walkathon hi Vengthar Chhipchhuat bazar atanga tan niin Taidawnkawn thleng neih a ni. He hunah hian Thutiam lakna hun (pledge taking) neih bawk a ni.

Chawhnu hun hi dar 2-a tan niin he hun hi Addl. DC Pu Lalfakzuala'n a kaihruai a, Bawrhsap Pu K. Vanlalthiana khuallian a ni. Khuallian Pu K. Vanlalthiana chuan he hun hi hun pawimawh tak, mipui leh khawtling hriselna leh himna atana hriat reng tul a ni tih a sawi a, thalaite ruihhlo vanga buai, lehkha zirna leh hnathawhna thlenga buai an awm hi pawi a tih hle thu a sawi a. He niah hian Khawzawl mipuite'n ruihhlo hlauhawmzia te, chhungkua, thian leh khawtlang a tihbuai nasat zia te, dan hnuaia hrem theih a ni tih te an hriat thar theuh a beisei thu a sawi a, khawtlang, tlawmngai pawlte leh sawrkar tangrualin ruihhlo bei zela a bawiha tang te chhanchhuak ngei turin a sawm bawk a ni.

SDC leh NMBA Nodal Officer ni bawk Pu R. Lalrinhlua'n NMBA hnuaia hmalakna chungchang report tawi a pe a, Chief Medical Officer Dr. Shahnaz Zothanzami chuan ruihhlo hlauhawmna leh a laka fihlim tura fuihna thu a sawi bawk. SDC Pu Paul Rokima'n lawmthu sawina hun a hmang a, hun tihtawp a ni.