2059/2026-2027 

Dated Khawzawl, the 3rd September, 2026 : Vawiin khan Khawzawl Bawrhsap Pu K. Vanlalthiana kaihhruaiin DC Conference Hall, Khawzawlah sawrkar office leh hmun pawimawh dang sak mekte dinhmun thlirhona meeting neih a ni.

He hunah hian Circuit House, Revenue Quarters, District Hospital, Mini Secretariat Complex leh Fire Station sak mekte thlen chin leh hmabakte sawiho a ni a. Harsatna tawhte leh chak zawka hma lak theih dan turte sawiho a ni.

Circuit House hi RZ Consultancy Firm, Zuchhip Veng, Khawzawl ten SASCI hnuaiah Rs. 8,14,02,926.00 sengin an sa mek a, August, 2025 khan sak tan a ni. Revenue Quarters hi Rovel Construction, Bethel Veng, Champhai ten SASCI hnuaiah Rs. 1,90,40,788.00 sengin October, 2025 khan an sa tan a ni.

District Hospital sak meka hna thawktu (contractor) hi Pu Lalnunmawia Bungkawn ‘W’ Aizawl a ni a. NESIDS OTRI hnuaiah Rs. 13,21,51,341.41 sengin June, 2024 khan sak tan a ni. Mini-Secretariat Complex sak hna thawk turin Evergreen Construction And Consultancy, Khatla, Aizawl thlan an ni a. SASCI hnuaiah Rs. 11,20,54,772 senga sak tur a ni a, a sakna tur hmuna building hlui thiah zawh a nih hunah hna thawh tan tur a ni. 

Fire Station hi CSS/Fire & Emergency Services Department atangin Rs. 1,74,48,257.00 senga sak tur a niin, hna thawk turin Pu K. Lalruatfela, Bethlehem Vengthlang, Aizawl thlan a ni. He meeting-ah hian Dr. Albert Lalhminghlua, Medical Superintendent, District Hospital, Khawzawl District, Er. H. Lalthanpuia, Sr. EE, PWD leh PWD-a thawktu dangte, BDO Pu Timothy R. Lalhmangaiha, DIPRO Pi Lalchungnungi Lakher leh DC office-a officer te an tel a ni.