1105/2024-2025

08.07.2024, Khawzawl: Vawiin khan Planning & Programme Implementation Department, Govt.of Mizoram hnuaiah Startup India chungchang zirhona leh inhrilhfiahna hun DC Meeting Hall-ah Addl.DC Pu Lalfakzuala ho a neih a ni a, Khawzawl District chhunga Farmer Producer Company aiawhte leh Khawzawl District Farmer Society aiawhte te telin, Mizoram Startup Mission (MSUM), Planning and Programme Implementation Department atangte leh Ministry of Commerce atangin mithiamte'n zirtirna an pe a ni.

Vawiin meeting kaihruaitu Addl. DC Pu Lalfakzuala chuan vawiin a Startup India hnuaia Post harvest management chungchang inhrilhhriatna an neih chu pawimawh a tih thu leh a ngaihhlut thu sawiin, Khawzawl District chuan thlai tharchhuah kan ngah hle rualin a hralh chhuahna kawng kan la zawh thui lo hle a ni,a ti a, chutiang a nih avang chuan Khawzawl District mipuite tan ngat phei chuan vawiin a an hun hman chu a hlu leh zual a ni, a ti.

Ruth Chawngthanpuii, Program Manager, Mizoram Startup Mission (MSUM), Planning and Programme Implementation Department-in Startup India Mission chungchangah kalkhawmte hnenah zirtirna pein, hei bakah hian Ministry of Commerce atangin mithiamte'n zirtirna hun hmang bawkin, kalkhawmte zingah interaction hun hman a ni bawk. Vawiin meeting ah  hian DC, Khawzawl leh Planning and Implementation Department tangkawpin remchang hmasa berah Startup India chungchangah Sensitization Programme neih tur a ruahhmanna siam a ni bawk.