1494/2024-2025

Khawzawl, dated the 8th August, 2024: Vawiin chhun dar 1:00 pm khan Khawzawl Deputy Commissioner, Pu K. Vanlalthiana chuan DC Office-ah District Water and Sanitation Mission (DWSM) meeting a ko a, Stop Diarrhoea Campaign 2024 July ni 1 atanga August ni 31 chhunga kalpui tur chungchang sawi ho a ni.

He hunah hian campaign chhunga hmun hrang hranga hma lak tawh te, school leh anganwadi a activity neih dan tur te leh social media a thehdarh dan tur te an sawi ho a, department hrang hrang mawhphurhna an rel bawk. DC Pu K. Vanlalthiana chuan meeting tluang taka a kal theih avangin lawmthu a sawi a, taima taka thawk ho zel turin member te a sawm bawk.

Stop Diarrhoea Campaign 2024 hi India ram pum huapin June ni 24, 2024 khan tan a ni a, kawthalo avanga naupang thi an awm loh nana hmalakna a ni. State level-ah July ni 5 khan hawn a ni a, Khawzawl district-ah hian Water Quality Testing leh Awareness campaign kalpui mek a ni. Heng bakah hian kawthalo laka inven him dan te, inthiarna hmun tihfai te leh naupang hnena faina leh thianghlimna zirtir te kalpui a ni ang.