No.7945/2020-2021

Dated Khawzawl, the 27th March, 2021:Tukin khan District Election Office, Khawzawl buatsaihin Khawzawlah Systematic Voters’ Education and Electoral Participation (SVEEP) Mini-Marathon buatsaih a ni.

Intlansiak hi Pu Zothanmawia, Khawzawl Bawrhsap leh District Election Officer ni bawk chuan hawngin a vailiam a. Kalkhawmte chu vote nei tura inziahluh leh vote thlak ngaipawimawh theuh turin a chah. India chu mipui siam sawrkar democracy ram a nih angin a khat tawkin inthlan a awm thin a, India khua leh tui dik takte tan chuan vote neih leh vote thlak hi ram inrelbawlnaa tel ve theihna pawimawh tak a nih avangin a hlu hle a ni, a ti. SVEEP kaltlanga buatsaih intlansiakna-a telte chu taksa hriselna ngaipawimawh a, intihsiakna awm dawnah chauh ni lo, nakin zelah pawh inthlahdah lova nitin nunphunga ‘fitness’ ngaipawimawha senglut turin a chah bawk.

Tukina SVEEP Mini-Marathon neihah hian mi 58 an tel a. A pumpuiah Isak Malsawmtluanga, Hermon Veng chu pakhatna niin certificate leh pawisa fai Rs. 5,000/- a dawng a. Pahnihna Lalsangpuia, Vengthar-in certificate leh pawisa fai Rs. 3,000/- dawngin, pathumna K. Vanlalthlanawma, Dinthar Vengin certificate leh pawisa fai Rs. 2,000/- a dawng a ni. Naupang kum 14 hnuailam zinga tlan thleng hmasa pathum K. Lalnunchhana, Vanlalhumhima leh Lalhmingmawia, Khawzawl Darngawn Veng vek te'n lawmman pawisa fai an dawng bawk. Lawmmante hi Pu Zothanmawia, District Election Officer-in a hlan a ni.