Kumin September Ni 5 a Zirtirtute Ni, Teachers' Day Khawzawla lawm dan tur chungchang relin vawiin khan  SDO (Sadar) Pi S.T. Lalvensangi, MCS hovin Khawzawl District Level Teachers'  Day Celebration Committee chu  D.C. Conference Hall-ah an thutkhawm.

Khawzawl District Function anih hnua Teachers' Day hmasa ber chu kumdangah School hrang hrangin anmahni remchan dan angin hmang mahse kuminah chuan Zaingen YMA Hall, Khawzawl-ah District Bawrhsap Pu H. Lianzela hovin ropui takin a huhova hman nise tih a ni a. Teachers Day pual a hun hman turah Programme kimchang chu Organising Committee in ruahmanna siam se tih a ni a.  Teachers'  Day puala Programme buatsaihnan hian D.C. Office in Rs.10,000/- an tumsak dawn a, School hrang hrangin thawhlawm an thawh dawn bawk a ni. Teachers'  Day lawmnaah hian Head of Office te sawm nise tiin Teachers' Day pualin School naupang ten zirtirtute chawimawina leh zahna thuziak hmun remchang laiah tar se tiin an rel a. Village Level a Teachers'  Day lawm dan tur pawh he hunah hian relin khaw hrang hrangah Village Council-te kaihhruaina hnuaiah Teachers'  Day pual hian hun hman nise tiin an rel bawk.

Teachers'  Day lawm dan tur ngaihtuah a thutkhawmnaah hian SDEO Pi K. Lalsiamliani bakah Zirtirtu pawl hrang hrang aiawhte, zirlai pawl aiawhte, VC aiawhte leh MJA Member te an tel a ni.