707/2026-2027

Dated Khawzawl, the 26^th May, 2026 : Vawiin khan Khawzawl Addl DC Pu K. Zorammuana kaihhruaiin DC Conference Hall-ah TEJAS (Transforming Entrepreneurial Journeys Across States & Districts) Programme neih a ni a. He programme hi Startup India, Department for Promotion of Industry and Internal Trade (DPIIT), Ministry of Commerce & Industry, Government of India, Mizoram Startup Mission (MSUM), Planning & Programme Implementation Department, Government of Mizoram leh Khawzawl Deputy Commissioner te ṭang ho huaihawt a ni.

Hun kaihruaitu Pu K. Zorammuana chuan Khawzawl chu district lian ni lo mahse mahni kutkawih thiamna (entrepreneurship) hmanga eizawnna leh district tihhmasawnna kawngah theihna sang tak a neih thu a sawi a. Tunah pawh sapthei atanga theitui siam te, nihawi atanga tel siam leh eco-tourism lamah te hmalak mek a nih thu a tarlang a. TEJAS chu Khawzawl mipui leh a bikin thalaite entrepreneurship lama tiharhtu atana programme pawimawh tak a nih thu sawiin, programme hlawkthlak tak hmang turin kalkhawmte duhsakna a hlan a ni. 

Vawiin hunah hian MSUM atangin Pi Ruth Chuauthangpuii’n TEJAS programme chungchang sawifiahna hun a hmang a. Bana kaih Progress Partner Pu K. Lallawmsanga’n sapthei atanga theitui siam (juice processing) a tan dan te, hlawhtlinna a chan leh harsatna a tawhte sawina hun a hmang a. MSUM Research Analyst Pi Vanlalparmawii’n Start-up India chungchang inhrilhhriatna a nei a. MSUM atangin Pu Lalngaihawma’n Mizoram BanaKaih Venture Capital Fund leh Pu Lalremsanga hnen atangin GST chungchang leh sumdawngte tan sum lut leh chhuak felfai taka chhinchhhiah dan chungchang ngaihthlak a ni a. 

Heng bakah hian department hrang hrang AH&Vety, Horticulture, Agriculture, Commerce & Industries, Geology & Mining atangtein Khawzawl district chhunga an hmalakna hrang hrangte thlirho a ni bawk a. Sawihona leh inzawhfiahna hun neih a nih hnuah SDC Pu R. Lalrinhlua chuan lawmthu sawiin hun a khar a ni. 

TEJAS Programme thil tum ber chu sumdawnna lian leh hmasawnna hi khawpui lian chauh ni lo, district tina khaw tin thlen tir a ni a. District tinah ‘Start-up Ecosystem’ (sumdawnna thar thanlenna hmun) dina, khaw hrang hrang thil siam chhuah thiamna chu ram pum huapa hralh chhuah theih dan zawn a tum bawk a ni. 

Vawiin TEJAS Programme-ah hian Khawzawl Higher Secondary School atangin zirlai naupang thahnem tak an tel a, khaw hrang hrang SHG-te, VCP leh Bana Kaih Progress Partner engemaw zat an tel bawk a ni.