1348/2022-2023
Khawzawl, the 25th July, 2022: India ramin zalenna a hmuh kum 75-na tlin hriatrengna leh lawmna kûtpui, Azadi Ka Amrit Mahotsav (AKAM) hnuaia Ministry of Power, New and Renewable Energy hmalakna kaltlangin vawiin chawhnu dar 1:00 khan Khawzawl Zaingen Branch YMA Hall-ah Ujjwal Bharat - Ujjwal Bhavishya Power @ 2047 lawmna hun hman a ni. He hunah hian India ramin zalenna a hmuh hnua State leh Central Sawrkar tangkawp kaltlanga power sector hnuaia hmalakna hrang hrangte tarlana inzirtirna neih a ni a, Prominent Citizen Pu C.Kera chu khuallian a ni.

Khuallian Pu C.Kera chuan electric power renchem chu chhungtin mawhphurhna a nih thu leh pawimawh lem lova hman a ni thin chu tha lo a tih thu sawiin, P&E Department ten tualchhung Chanchinbu leh TV kaltlanga power renchem tura ngenna an puangzar thin chu zawm theuh tum turin mipuite a sawm a. Kangmei laka inven nan current hman fimkhur a ngai a, electric hi amahin a kal sual ngai lova, kan fimkhur loh vangin kangmei a ti chhuak thin zawk a, hemi kawngah hian Department thu ngaihchan thiam leh an thuchhuahte zawm hram hram kan tum tur a ni, a ti bawk.

Khawzawl District chhunga electric power neih dante leh Sawrkarin Sub-Station thar siam tuma hma a lak mek thute tarlangin, a hlawhtlin theih nan theihtawp chhuaha Department tawiawm a tul thu a sawi a. Khawzawl District chhunga Vankal Solar Park siam mek March 2023 a peihfel hman tura beisei chu ram tana tangkai tak tur a nih thu a sawi bawk.

Thusawitu dang Pu Lalmalsawma Zote, District Nodal Officer, Manager, Power Grid chuan tun kum 8 kalta chhungin India ram pumah transmision line circuit km nuai khat singruk siam belh a nih thu leh thingtlanga meieng pek hmalakna rural electrification-ah hmasawnna nasa tak thlen a nih thu leh, Megawatt nuai khat vel kawlphetha luangchhuak leh lut a awm thu a tarlang a. Mizoram-ah circuit kilometre 300 a thui a awm thu sawiin, he ni puala inzirtirna lam hawi video enho leh thil hriattharte atangin hlawkna nasa tak mipuiten an hmuh a beisei thu a sawi a. India ram hian electric power a neih that chuan hmabak eng tak a nei dawn a ni, a ti bawk.

He hun hi District Bawrhsap Pu C.C. Lalchhuangkima chuan kaihruaiin kalkhawmte lawmna thu a sawi a. He hunah hian India ramin zalenna a hmuh hnu kum 75 chhunga kawlphetha dehchhuah leh intodelhna kawnga hmasawnna leh hmalakna hrang hrangte tarlan a ni a, P&E Department, Khawzawl Power Division-in lemchan tawi an entir a. Khawzawl DC Office buatsaih film presentation thlirho a nih bakah Ujjwala Scheme hnuaia hamthatna dawngtu mi 3 thlan chhuah ten hlawkna an dawn leh tawnhriatte an sawi a. Pu K. Duhsanga, E.E., P&E, Khawzawl Power Division-in thu a sawi bawk a. Pu Obed Lalmalsawma, SDC in lawmthu sawiin hun a khar a ni.