No.3942/2021-2022
Aizawl, the 9th February, 2022: Vawiin chawhma dar 10:00 khan Khawzawl District Administration, Animal Husbandry & Veterinary Department, District Village Council Association leh Khawzawl Vawkpui Vulh Association-te chu DC Conference Hall-ah vawk note man bihliah leh vawk lakluh chungchang ngaihtuahin an thukhawm.
Meeting kaihruaitu District Bawrhsap Pu C.C. Lalchhuangkima chuan District pawn hmundanga vawk note leh vawksa thawnchhuak thei tur khawpa intodelh nise a duh thu a sawi a. District mipuiten vawkvulh an uar a, mi nawlpuiin vawk note an leia an vulh ve theih nan vawk note man sang lutuk tur ven a ngai thin tih a tarlang.
Meeting-a tarlan a nih danin African Swine Fever (ASF) avangin Khawzawl District-ah vawk 1,024 a thi niin chhinchhiah a ni a, Khawzawl Town bikah chuan ASF vanga thi zat hi 624 a ni a. District thenawma vawk note mante thlirho niin, vawk chaw leh thildang man sang chho zelah vawk note man tihsan chu thil awm tak ni a hriat a ni a, chuvangin rate hman mek vawk note man Rs. 6,500/- aia sang lo tih chu Rs. 7,000/- aia sang lo ni tura tihsan nise an ti a. Chutihrualin, Rs. 7,000/- a hralh tur vawk note chu ni 60 tala upa nise tih a ni bawk.
Khawzawl District pawn atanga vawk lakluh chungchang pawh meeting-ah hian sawiho niin, District chhunga ranvulhte hri danna pek runpui (mass vaccination) kalpui tum mek a nih avang leh, ASF hrileng dinhmun thlithlai a la tul rih avangin, AH&Vety. Department thurawn angin vawk lakluh chu khap chhunzawm rih nise tih a ni bawk.
Attachment
- Loading attachment...
