1290/2024-2025

Khawzawl 24th July, 2024: Khawzawl District-a Village Council (VC) pahnih,Chawngtlai leh Khawzawl Dinthar a By-Election buatsaih tura Draft Electoral Roll chu vawiin khan Khawzawl District Election Officer, Khawzawl Bawrhsap Pu K Vanlalthiana chuan Khawzawl DC Meeting Hall-ah a tlangzarh a, Draft Roll bu hi  political party aiawhte hnenah semchhuah nghal a ni.

Pu K Vanlalthiana chuan Electoral Roll dik leh rinthlak neih theih nana Election Official-te hmalakna bakah NGO leh khawtlang hruaitu ten an tawiawm thinna chu fakawm a tih thu a sawi a, Mizoramin MPF kan nei chu lawmawm a tih thu sawiin, a hlutzia hriat nawn a tul a ni, a ti. Khawzawl District in inthlanna dik leh thianghlim an neih thin chu an chhawm nun zel theih nan kalkhawmte chu theitawp chhuah zel turin a sawm a ni.

Village Council By-Election neih turah hian Chawngtlaiah General seat 4 leh reserved seat 1 awmin, Khawzawl -(Dinthar) ah General seat 1 hnawh khah tur a awm bawk a ni.

Vawiin a Draft Electoral Roll,2024 tlangzarh atanga a lan danin, Khawzawl Dinthar ah vote nei 784 (Mipa 386, hmeichhia 398),Chawngtlai-I ah 641 (mipa 328,hmeichhia 313) leh Chawngtlai-II ah vote nei 624 (mipa 325, hmeichhia 299) an awm a. Final Electoral Roll, 2020 nena khaikhinin Khawzawl Dinthar ah hian voter 3 in an pung a, Chawngtlai-I ah hian voter 14 in an kiam a, Chawngtlai-II ah hian voter 25 in an kiam bawk a ni.

Village Council By-Election a tan a Special Summary Revision of Photo Electoral Roll, 2024 ah hian qualifying date chu July ni 1, 2024 a ni a, hemi ni a kum 18 tling hman tur India khua leh tui (citizen),Scheduled Tribe,Village Council huam chhung a cheng ngei te tan Electoral Roll-a inthun dil theih a ni a, hemi rual hian siam that ngai siam, paih ngai paih leh insawn duhte siam fel theihna hun pawh hawn a ni a. Ruahman dan chuan Special Summary Revision of Photo Electoral Roll 2024 kaltlang hian July ni 24 atanga July ni 31, 2024 chhungin Claims and Objection Period- Electoral Roll-a inthun, paih, insawn leh siam that, dilna thehluh theih hun chhung hawn a ni a, hemi hun chhung vek hian a remchan dan angin hearing neih chhoh zel a ni ang. Dilna  leh rawtna thlente thlir ho a database siamthat leh supplement chhutchhuahte tihfel a nih hnuah August ni 13, 2024 hian Electoral Roll thar ber tlangzarh tum a ni.