No.2/2021-2022

Dated Khawzawl, the 1st April, 2021: Nimin khan Khawzawl District Disaster Management Authority (KDDMA) chuan YMA Hall, Khawzawl Zaingen Branch-ah District chhunga Village Disaster Management Committee te tan “Capacity Building Training” a buatsaih.

Training hawngtu Deputy Commissioner Pu Zothanmawia, Khawzawl DDMA Chairman ni bawk chuan chhiatrupna chu hriat lawk lohva thleng thut thin a nih avangin chhiatna thleng thei laka mumal taka lo inpuahchaha, inrinlawk reng a tul tih a sawi a. VC leh YMA te chu khawtlang hruaitu chhiatrupna thlen pawha che chhuak hmasa an nih avangin a tul anga che chhuak thei tur leh, thutlukna siam zung zunga mumal taka rorel thei turin an inbuatsaih a tul a ni, a ti a. Training chu ‘Disaster Management’ chungchanga an hriatna leh theihna tipungtu atan hmang tangkai ngei turin duhsakna a hlan bawk a ni.

Vawiina training-ah hian Pu H. Lalramenga, SDC i/c DM&R chuan powerpoint presentation hmangin State Disaster Response Fund (SDRF) leh National Disaster Response Fund (NDRF) atanga tanpuina awm thei bakah lirnghing-a tih tur leh tih loh turte a sawi a. Pu VL. Hruaimawia, District Organizer, DM&R Champhai District-in VDMC te mawhphurhna leh Village Disaster Management Plan chungchang zirtirna a pe bawk.

Pu Vantlangkhuma, Superintendent, DC office, Khawzawl hnen atangin Quick Response Team dinchhoh dan leh an mawhphurhnate ngaihthlak a ni a. Khawzawl DDMA hnuaia Quick Response Team Member te’n VDMC Member-te hnenah chhiatrupna thlen thulha chhanchhuah hna thawh dan tur leh damlo te bawihsawm dan turte zirtirna an pe bawk a ni.

Vawiin Training-ah hian Khawzawl District huamchhung khaw hrang hrang atangin VDMC Member 57 an tel thei a ni.