No.4216/2021-2022

Aizawl, 9th March, 2022 : MzSRLM, Khawzawl RD Block leh Swacch Bharat Mission (R), PHE WATSAN Division, Khawzawl tangkawp bultuma MzSRLM hnuaia Self Help Group te tana intihsiakna buatsaih, Water & Sanitation kaltlanga inelna result chu vawiin chawhma dar 11:00 khan Khawzawl Electric Veng YMA Hall-ah puan a ni a, he hun hi District Bawrhsap Pu C.C. Lalchhuangkima chuan khuallian niin a hmanpui a ni.

Khawzawl District Bawrhsap chuan thu sawiin, 'Competition on Water & Sanitation' chu intihsiakna changkang tak leh pawimawh tak a ni tih sawiin, intihsiaknaah SHG 45 lai an tel thei leh Khawzawl RD Block bakah Block dang pathum atanga SHG te an tel thei chu lawmawm a tih thu a sawi a. Mi thenkhat tan Ek in fai pawimawhzia te hi sawi ngai lo ni tawh mahse Mizoramah hi chuan hei hi sawi ngai reng a ni, a ti a. Mimal inthiarna te chu thianghlim pawh nise vantlang inthiarna leh vantlang hmun tihfai leh tih thianghlimna chang hriatna kawngah erawh hma kan sawn a ngai a, inzir kan ngai a, hei hi SHG nuho te hian fate leh chenpui chhungte bulah kan thehdarh a ngai a ni, a ti.

Pu C.C. Lalchhuangkima chuan tui thianghlim leh tuihna humhalh pawimawhzia chu sawi tawh awm thei lo, sawi nawn fo tul a ni a ti a. Hun rei vak lovah Mizoram-ah hian tui tlakchhamna ala thleng dawn tih sawiin, Khawzawl RD Block-ah pawh tui harsatna hi reilote-ah kan tawng dawn a ni, a ti a. Keimahni ngeiin kan humhalh loh chuan engtikni-ah emaw chuan thal alo thlenin kan harsa ang a, ruahsur chauhin tui kan hnianghnar dawn thu a sawi a. Kan changkang zel ang a, nakinah phei chuan ruahsur lai pawhin tui neih loh hun kan nei mai ang tih hi a hlauhawm hle a ni a ti bawk. Thalaite leh Mizoram mipuite hian tuihna humhalh hi kan ngaihpawimawh a tul a, In lamah tui dinhmun hrechiangtu ber chu nuho an nih avangin SHG nuho pawhin hei hi an ngaih pawimawh a tul tih a sawi a. Lui tuite hi kan humhalh loh a, duatna chang kan hriat loh chuan keimahni vekin kan tuar dawn tih a sawi bawk.

Khuallian chuan waste product chungchang pawh Mizoramah ngaihven a ngai hle tawh tih a sawi a. Hma kan sawn a, hmasawnnain min rawn luhchilh a, naupang ei leh in thil chi hrang hrang, mumal taka pack sa te a rawn lut ruih ruih a, kan ei in kan in a, reilote-ah a kawr kan paih a, hei hi kan ngaihtuah leh si loh chuan nakinah chhiatna a rawn thlen thei dawn a ni a ti a. Plastic product kan tih tam takte phei hi chu a tawihral ve thei si lova, kan lui tui te, kan bawlhhlawh paihna hmun thleng hian tunah hian kan tuar tan tawh a ni a ti a. Bawlhhlawh kan paihte hi khawiah emaw kan sawngbawl si loh chuan a tawpah keimahni vekin kan tuar thei a ni, a ti bawk.

He inelna huangah hian RD Block 4 - Khawzawl, Tlangnuam, East Lungdar leh Darlawn RD Block atangin SHG 45 an tel a, intihsiakna chi 3 neih a ni. Category-I, Inthiarna felfai leh thianghlim neih pawimawhzia tarlanna Poster inziahsiakah Loisi SHG, East Phaileng V.O., Darlawn Block chu pakhatna an ni a. Category-II, Tui thianghlim leh tui hna humhalh pawimawhzia tarlanna Poster inziahsiakah Sawmfang SHG, Kawlkulh North VO, Khawzawl Block chu pakhatna an ni a. Category III, Waste Product hmanga thil insiamsiakah Biakhluni, Daisy SHG, East Lungdar VO, East Lungdar Block chu pakhatna a ni.
Vawiin hun hman hi Pi Lalduhawmi, H.A, PHE WATSAN Division-in a kaihruai a. Pi Lalrammuani, BMM, MzSRLM Khawzawlin report pe in Judge aiawhin Pu Lalrotluanga Ralte chuan report a pe a ni. Programme-ah hian PHE Department Staff te bakah MzSRLM hnuaia SHG hrang hrang aiawhte an tel a ni.