872/2026-2027 

Dated Khawzawl, the 5th June, 2026 : Vawiin khan Environment Forest & Climate Change (EF&CC) Department bultumin Khawzawl Government High School-ah World Environment Day pualin hun hman a ni a. He hun hi Headmaster Pu Lallawmthanga’n a kaihruai a, Khawzawl Wildlife Division DFO Pu Lalnunthanga leh Khawzawl District Honorary Wildlife Warden Pu PC Rosiama te chuan an hmanpui.

DFO Pu Lalnunthanga chuan World Environment Day 2026 theme 'Inspired By Nature, For Climate, For Our Future’ tih thupui-ah hmangin, zirlai kalkhawmte hnenah ramngaw leh nungchate humhalh a pawimawh zia a hrilh a. Kumin World Environment Day puala khawvel pum huapa hun hmanna pui ber chu Azerbaijan-a neih a nih thute a sawi bawk a. Mihring leh nungchate chu in mamawh tawn reng kan nih thu sawiin, ramngaw leh nungchate kan humhalh lova, thing leh mau kan kit nasat lutuk avanga khua a lum telh telh (global warming) thu te, chu chuan taksa leh rilru hriselna pawh a tihchhiat thu leh natna inkaichhawn theih chi hrang hrang a hluar phah thu te a sawi a. Zirlaite chu ramngaw leh nungcha humhalh a pawimawh zia zira hrechiangtu an nih angin auchhuahpui ngam turin a fuih a. Hemi kawngah hian an finna leh thiamna hmang tangkai zel turin a chah bawk a ni.

Honorary Wildlife Warden Pu PC Rosiama pawhin nungchate leh ramngaw nasa lehzuala humhalh a ṭul thu leh hemi kawnga theih tawp chhuah tura fuihna thu a sawi bawk.

Vawiin hunah hian kalkhawmten Environment Day pualin thutiam an sawi rual a. Mi pahnihin an silaite tungin (Surrendering of weapons)  Deptt Hotute hriatpuinain hming an ziak bawk a ni,.