“Khuanu siam rochun te leh kan pipute sulhnu te hi khawih danglam lova anih ang anga humhalh hi a hlu” Chief Minister Pu Lal Thanhawla chuan a ti. He thu hi vawiina I&PR Auditoriuma INTACH Mizoram Chapter-in lehkhabu an buatsaih, ‘Built Heritage of Mizoram’ tih a tlangzarhnaa a sawi a ni.

Chief Minister chuan kan pi leh pute sulhnu humhalh nachang kan hre tlai hle a, INTACH Mizoram Chapter in hma a rawn la ta hi thil pawimawh tak a ni a, a lawmawm hle a ni a ti a. Heng kan pipute atanga kan rochun te hi chhuan lokal leh zel tur te tan zir tur leh hriat tur pawimawh tak tak an ni a ti a. Heng kan rochun ‘built heritage’ kan tihte hi tha taka enkawlzui a tul thu a sawi a. A hmunhma te kan cheibawlna lamah a nihna dik tak a tihbo theih avangin anih ang anga humhalh mai hi a tha a ni a ti. Pu Hawla chuan a sawi zelnaah Thasiama sebawngno neihna kan tihte leh Chawngchilhi puk kan tihte hi cheibawlin, a kalna tur step te siam hian a hlutna a ti chuai hle a ni a ti. Chuvangin kan humhalhna kawngah anihna tak tibo lovin (originality) fimkhur taka kalpui atul a ni a ti. Hun lokal zelah built heritage chauh nilo, natural heritage te pawh la document vek anih a beiseiawm a ni tiin, INTACH hmalakna chu sorkar ang pawhin a thlawp hle a ni a ti.

Heritage kan tih hi chi hniha then a ni a, khawih theih (tangible) leh khawih theih loh (intangible). Khawih theih te hi mihring siam building (structure) te a huam a, khawih theih loh hian hla te, rimawite, thawnthu te a huam a ni. INTACH Mizoram Chapter hian kum 1950 hmalama rochun kan neihte a humhalh mek a, tunah hian Lawngtlai leh Mamit district tih lohah district dang parukah building 88 vel a humhalh mek a ni.

INTACH Mizoram Chapter lehkhabu tlangzarh inkhawm hi Covener Pu P. Rohmingthanga’n a kaihruai a ni.