Vawiin khan Mizoram State Tobacco Control Society (MSTCS) buatsaihin I&PR Conference Hall-ah kohhran hrang hrang hruaitute tan vaihlo chungchang zirhona workshop buatsaih a ni a. Presbyterian Church, Baptist Church of Mizoram, Salvation Army, Roman Catholic, UPC (NEI), UPC (Mizoram), Seventhday Adventist, Methodist, Lairam Isua Krista Baptist Kohhran, Evangelical Church of Maraland, Zomi Baptist Church, Evengelical Free Church of India, Independent Church of India, Assembly of God, Wesleyan Methodist, IKK (Sen), IKK (Var), Mizo Independent Church, Rinna Kohhran leh Kohhran Thianghlim hruaitute sawm an nih angin an tel tha hle. He hun buatsaih a nihna chhan pakhat chu engtinnge kohhran hrang hrangten vaihlo dona kawngah kan kohhhran theuhah te hma kan lak ang tih a ni.

He hun hi Rev.B.Lalrinawma, Baptist Church of Mizoram, Zotlang Bial Pastor chuan Pathian hnena hlanna a nei a. Dr.Jane R.Ralte, State Nodal Officer cum Project Officer, Mizoram State Tobacco Control Society chuan Vaihlo Khuahkhirhna atan thil pawimawh hrang hrangte a sawifiah a, vaihlo-in Mizote zinga cancer hrang hrang a thlen nasat zia leh khawvel huap pawha Cancer vei tam lama Mizoram san zia te, Population Based Cancer Registry, November 2010-a neih chuan India rama district hrang hrang a zirchiannaa a landanah chuan mipa leh hmeichhia-ah Aizawl chu a san ber thu leh District dang Serchhip, Kolasib, Champhai leh Mamit te pawh Top Ten a an lan thu a sawi bawk. Hemi bakah hian vaihlo hmanin mahni bakah chenpuite a tihbuai theih dan a sawi a, Vaihlo khuahkhirhna dan chungchanga hriattur pawimawh te a sawi bawk. Kohhran hruaitute pawh vaihlo hman kawnga fihlim leh sim turin a sawm a, kohhrana thalaite leh naupangte pawh zirtirna pek tam a tul avangin kohhran te hi an pawimawh a, vaihlo dona kawngah thawhpui turin a sawm bawk a ni.

Rev.P.L Biakchhawna, Director, Health & Communication, Seventh Day Adventist chuan “Kristianna leh Vaihlo” tih chungchang a sawi a, kristianna leh vaihlo hman hi a inhmeh loh thu sawiin kohhran hrang hrangten engtinnge vaihlo dona kawngah hma an lak ang ti chungchangah sawizauna hun a nei bawk. Vaihlo hman hi drugs hmang ang thovin Kristian tan hman a inhmeh lo a ni. Setana hian Vaihlo hmangin Mizoram Kristiante hi a run nasa hle mai a, rim taka kan thawhchhuah chu atthlak takin min hal raltir a ni, a ti. “Pathian kan pawlna tur fianrial hun awlah vaihlo min hmantir a. Pathianin hmel duhawm tak min pek chu lan chhuahtir thei lovin kan hmai a ti duk a. Kohhranten damlo kan tawngtaipuite zingah vaihlo vanga cancer vei an tam hle. Kohhran thawhlawma kan hmingthatna hi vaihlo vanga kan hmingchhiatna hian a khuh bo zo va. Kan chanchin chhia hian Krista Chanchin Tha a hliah zel a, he hmingchhiatna hian Ramthara kan rawngbawlna thlengin a tithuanawp tan ta a ni. Chhungkaw tlakranna bakah bawrhsawmna leh thihna hial thlen thei a ni. Meizial zutu mei pak khu lo hip leh chhawngtu hriselna thlengin a khawih pawi thei a, heng natna hrang hrang cancer, thawhah, chuap tha lo, bengkherh leh natna hrang hrang a thlen thei a; naupai tan mi meizuk khu hip luh leh vaihlo hman avangin nau piang hlim zang lutuk te, nausen chhan hriat lohva thih thut leh thla kim lova piangte mai bakah nausen an sawngnawi bik thin a ni,” a ti.

Rev.P.L.Biakchhawna chuan World Health Organisation-in Vaihlo hi a ngawl vei theih, ruihhlo (Drugs) chi khatah a pawm tawh a, chuvangin ram changkang apiangin Vaihlo hi an do nasa a, India sorkar pawhin puipunna hmuna meizûk khapna dan a siam tawh a, Biak in leh a hung chhung hi vantlang punkhawmna hmun a nih avangin, mei kan zûk chuan, dan bawhchhia kan ni a, man theih leh chawitir theih kan ni, a ti bawk. Biak in hung chhung hi Vaihlo vanga sorkar dan bawhchhiatna hmuna chantir lo hram turin tih tak zetin kohhran mipuiten an hriat a tha hle a, hetiang ruihhlo ngai, kohhran leh ram timualphotu, Pathian leh Sorkar ngaiha thil sual titute hian, an sim loh chuan, Kohhran hruaitu atana thlang lo tur leh rawngbawltu atana ruat lo hram turin Mizoram kohhran hrang hrangte ngen an ni.

Hemi hnu hian Group hrang hranga inthen darhin Group Discussion neih leh a ni a, group hrang hrangte hian engtinnge kohhhran te hian vaihlo dona kawngah hma an lak theih ang tih an sawikhawm hrang hrang hmang chuan presentation neih leh bawk a ni. Group work atang hian kohhran hrang hrangten vaihlo hi sual chi khat a ni tih sawi a ni a, kohhran hrang hrangten Sunday School te, kohhran chhunga pawl hrang hrang Nu ho te, Pavalai te, Thalai Pawl te leh Naupang Sunday School atang te a hmalak hi hlawk hle turah an ngai a ni.

Rev.K.Lungmuana, Chairman, Mizo Moral Reformation Network International leh President, IMEM chuan Workshop kharna hun nei in, kohhran hrang hrangten vaihlo dona kawnga hma la theuh turin leh Workshop a rawn kal zawng zawngten hlawk tlang taka an hman tlan vek a beisei thu sawiin an thil hriatte an kohhran theuha puangzar turin a chah bawk.