Kolasib-a Horticulture trade thlangtu NLUP beneficiary 236 te hnenah vawiin khan Pu PC Zoramsangliana, Transport Minister chuan an hna thawh chhunzawmna tur 3rd instalment pawisa a hlan.

Pawisa hlanna inkhawm hi Project venga AMFU Hall-ah neih a ni a. Kuhva chingtu te hnenah Rs. 30,000/- theuh pek an ni a, Iskut chingtu hnenah Rs. 28,500/-, Serthlum chingtu hnenah Rs. 30,000/- leh Lakhuihthei chingtu hnenah Rs. 19,000/- theuh Minister hian a hlan hlawm a ni. Tihian beneficiary theuh te hnenah a vaiin Rs. 70,000/- hlankim a nita a. Kolasib tih loh District chhunga khaw dangte chu Bank kaltlangin hlan tawh leh hlan mek zel an ni bawk a ni.

Pu PC Zoramsangliana chuan Congress sawrkar chuan a thutiam nem nghet zelin eng sawrkar maha la tih ngailoh mi rethei kut hnathawha eizawngte tan a bikin tangka a dahsak a, vawiina a dawngtute hi a taka malsawmna dawngtute in nita a ni, a ti. Kan sawrkar tirha kan manifesto kha thlir let fo ula, tih loh kan la neih in hriat chuan min chhal ula, kei hi La nilovin in tana hna thawk tura local ka ni, a ti. NLUP hi sawiseltu awm fo mahse bul kan tan lai ai khan a hlawhtlinna kan hmu chho zel a ni, a ti a. Taima taka tu leh fate chhawm tlaka hausakna paw chhuak turin beneficiary te chu a chah a ni.

Pu Zoramsangliana chuan thil reng reng hi a tak ram (practical) kan mamawh tawh a. Intihderna leh lungleng zawnga kal a hun tawh lo a ni tiin, kum 10 kan sawrkar loh chhung khan mi rethei leh hausa inkar a zau hman hle a. Compensation hmanga sum siamna te hluarin retheihna in min tuam a.That chhiat vang ni silova kalphung tleu kan tam a. Chumi tuam dam tur chuan Central sawrkar tanpuinain theihtawp kan chhuah ta a ni, a ti. Serlui Hydel project pawh tih chingpen ni tawh mahse theihtawpa kan thawm hnuah tunah chuan a taka eng pe chhuak thei alo nita a ni. He NLUP hi bul kan tan tirh laia kan hmathlir aiin sawrkar laipuiin nasa takin min phurpui a, hei ngei hi kan ram dinchhuah nan tiin taima takin thawk ang che u, a ti a ni.

Pi Zosiamliani, DHO, Kolasib chuan NLUP semna inkhawm hi a kaihruai a. He hunah hian Davida Home, Blind School leh Enna In te hnenah Minister hian puanthui khawl a pe bawk a ni.