2596/2023-2024

2023 Sahmulphah thla ni 2: Tukin khan Kolasib District Bawrhsap Pu John LT Sanga chuan Kolasib-a St John's Higher Secondary School Auditorium chei ṭhat thar chu hawngin, St John's HSS-in ni hnih awh Inter-House Cultural Meet an neih tur chu a hawng nghal bawk.

Auditorium leh cultural meet hawnna puala inkhawm tawi buatsaihah Kolasib Bawrhsap Pu John LT Sanga chuan St John's HSS-in ṭha tak leh changtlung taka auditorium an chei thar a, hman theiha an peih fel ta chu lawmpuina a hlan a. St John's HSS-in an kum tin dana inter-house cultural meet an buatsaih leh thei chu lawmawm a tih thu sawiin, lehkhabu kal tlang leh classroom chhunga zirna pangngai piah lamah, zai, lam, infiamna leh co-curricular activity (CCA) hrang hrang chu zirlaite ṭhan lenna kawnga puitu, mihring puitlinga chher chhuahna hmanraw pawimawh tak a ni, a ti a. CCA chu zirtirtute leh zirlaite inkara inpawhna, thawh hona leh inhriat thiam tawnna ṭha zawk siamtu, zirlaite khawhawi tizautu leh zirlai zinga thiam thil bik (talent) neite zawn chhuahna hmanrua a ni tiin, tun ṭuma St John's HSS-in cultural meet an neih chuan hnam ziarang ngaihhlut leh chawi nun kawngah zirlaiteah rah duhawm tak chhuah se a duh thu a sawi a. Cultural meet nuam, hlimawm leh hlawk tak hmang turin zirlaite chu duhsakna a hlan a ni.

St John's HSS, Kolasib auditorium chei ṭhat thar hawnna leh inter-house cultural meet hawnna puala inkhawm buatsaihah hian School Principal Brother Saiju P. Michael chuan inlawmna thu sawiin, report a pe a. Brother Andrew Lalbiakfela'n hunserh hmangin, auditorium thar leh cultural meet chu malsawm ṭawngṭaiin a hlan a. Bawrhsap leh Father bakah, zirtirtu leh zirlaite'n khawnvar chhitna hun (lamp lighting ceremony) hmang bawkin, hnam lam, zai leh rimawi hmanga house hrang hrang intihsiakna, cultural competition buatsaih zui a ni.

St John's HSS zirlaite hi house pali - Blue House, Green House, Red House leh Yellow House-ah te an inṭhen a. Inter-House Cultural Meet hi November ni 2 leh November ni 3, 2023-ah te hmangin, hnam lam, zai leh rimawi hmangin house hrang hrangte hi an inel dawn a ni.