Kut hnathawktuten hlawk zawka buh chi tha leh tui an chin theih nan KVK KOlasib chuan vawiin khan buh tui thlanchhuahna hun anmahni office, Kolasib Vengthar-ah an buatsaih a. Kum hnih kalta chhunga buh chi 24 a taka an lo tharchhuah tawh atangin buh chi tha leh tharhlawk Tamphaphou chu buh tui berah thlan a ni.

Buh tui chin uar tlak thlangchhuak tur hian Pu C. Lalthlamuana, prog. Co-ordinator leh a thawhpuite chuan mi thanbik sawmin Pu K. Zirliana, DAO; Dr. Saihlira, DVO; Pu R. Lalduhawma, President, AMFU, Mizoram; Pi Lallianpuii, DIPRO; Pu Andrew V.L. Auva, Editor, Kolasib Today leh Pu H. Vanlalnghaka, DDK ten buh tui thlanna hi an nei a. KVK tena a tui zual panga an lo chhawpchhuah tawh atangin buh chhum hmin sa tem lawrin an thang a. Tamphaphou, Manipur atanga a chi lak chu buh tui ber, Kolasib District leilung leh sik leh sa in a mil ber, buh tui berah an thlang ta a ni.

Pu C. Lalthlamuana, Prog. Co-ordinator chuan sorkar-in buh thar tam kum a puan bawhzuia buh chi tha, tui leh hlawk mipuite hnena kawhhmuh tura tan an lak dan sawiin kum hnih chhung research Chemphai Farm ah an nei tawh tih a sawi a. Hetah hian buh chi tha 24, Manipui, Mizoram, Assam leh Hyderabad ami an lakkhawm te an ching a. Chuta a thar zawng zawng zinga tui leh tha zual 5 an thlanchhuah atangin vawiin hian buh tui thlanna hi an nei ta a ni. Buh tui leh hlawk zual 5 thlanchhuah te chu - Tampaphou (Manipur); Sampada (Hyderabad); Piolee (Assam); Aizong (Assam) leh RCM 10 (Manipur) te an ni.

Sorkar-in buh thar tam kum a puan bawhzui nan hian KVK Kolasib chuan Research belhchiah dawl leh innghahna tlak neia Lo neitute kawhhmuh turin theih tawpin tan an la a, hei hian loneitute hnathawhna kawngah hlawkna tha tak a pek ngei beisei a ni.