2471/2023-2024

2023 Khuangchawi thla ni 24: Mizoram Legislative Assembly Inthlanpui, 2023-a Kolasib District chhunga assembly bial pathuma inthlan chuhtu candidate-te, an election agent-te leh an expenditure agent-te tan vawiin khan Kolasib DC Conference Hall-ah election expenditure training buatsaih a ni.

He hun hi Kolasib District Election Officer Pu John LT Sanga chuan hmanpuiin, Kolasib District Expenditure Observer Pu Karni Dan pawhin a telpui a. ARO Pu Cheemala Siva Gopal Reddy leh Election Officer Pi Christina Lalmuanzuali te'n an telpui bawk.

He hunah hian District Level Master Trainer Pu Gilbert Lalhlimpuia, Assistant Expenditure Observer (Kolasib AC) Pu Kevin Lalmalsawma, AEO (Tuirial AC) Pu Lalramhluna Colney leh AEO (Serlui AC) Pu PC Lalmuansanga te'n election expenditure chungchanga hriat tur pawimawh hrang hrang an zirtir a. Inthlan campaign nana sum hman chungchang leh inthlan kaihhnawih thil chi hrang hrang chungchangah zawhna leh chhanna leh sawi hona hun hman a ni bawk.

ECI chuan kumina Mizorama MLA Inthlanpui buatsaih turah candidate tin chu inthlan campaign sensovah cheng nuai sawmhnih pariat (₹ 28,00,000/-) thleng hman a phalsak a. Candidate tin chu inthlan kaihhnawiha an hman tur designated bank account hawntir vek niin, inthlan chuh tura hming an pek luh aṭangin candidate-te chu campaign-naa an sum hman dan uluk taka chhinchhiah leh vil zui reng an ni a. Sum hman dan khuahkhirhna hi inthlan felfai leh thianghlim tak a awm theih nana ruahman a ni.