3783/2023-2024

2024 Ramtuk thla ni 12: Vawiin chawhma khan Kolasib District Consultative Committee (DCC), District Level Security Committee (DLSC) leh District Level Review Committee (DLRC) chu an Chairman, Kolasib District Bawrhsap Pu John LT Sanga hovin Kolasib DC Conference Hall-ah an ṭhu khawm.

Chairman Pu John LT Sanga chuan member kal khawmte lawmna thu sawiin, meeting awmze nei tak a awm theih nan ngaihtuahna seng turin a chah a. Sawrkar hma lakna hrang hrang hlawhtlin nan bank lam leh department-te thawh hona ṭha a pawimawh thu a sawi a. Mipuite'n bank kal tlanga dil theih scheme leh loan chi hrang hrang an hriat zau theih nan inzirtir tam a pawimawh thu sawiin, financial literacy campaign (FLC) an neih ṭhin chu uar lehzuala kalpui turin banker-te chu a chah a ni.

He ṭhut khawmah hian Lead Bank Office-a Lead District Manager (Kolasib & Mamit) Pi Lalengmawii, Reserve Bank of India (RBI), Aizawl ai awh Pu Ashish Rai, NABARD hnuaia District Development Manager (Kolasib & Mamit) Pu JD Traite te bakah, bank hrang hrang leh line department ai awhte an tel a ni.

He hunah hian meeting hmasa, November ni 29, 2023-a DCC meeting minute chu pawm a ni a. Kum 2023 October thla aṭanga December thla (3rd Quarter, 2023-24) chhunga Kolasib District-a bank hrang hrangte hna thawh thlir let niin, hmachhawp an neih leh hma lak zui dan tur te sawi ho nghal a ni.

He hunah hian financial inclusion plan hnuaiah Kolasib District chhunga mihring 2,000 aia tlem chenna khaw 29 te chu mipuiin bank kal tlanga hamṭhatna hrang hrang an chhawr ve theih nan an khuaah bank branch emaw, business correspondent emaw, Indian Postal Payment Bank emaw dah kim a nih thu tar lan a ni a. Pawisa dah hmasa lo (zero balance)-a account hawn theihna, Pradhan Mantri Jan Dhan Yojana (PMJDY) leh social security scheme hrang hrang - Pradhan Mantri Jeevan Jyoti Bima Yojana (PMJJBY), Pradhan Mantri Suraksha Bima Yojana (PMSBY) leh Atal Pension Yojana (APY), etc. lama bank hma lak dan te thlir ho niin, mipui tam zawkin he'ng hamṭhatnate hi an chhawr theih nan ṭan lak lehzual ni se, tih a ni a. October - December 2023 inkar chhungin bank hrang hrang kal tlangin mipui hnena sum hman leh enkawl dan inzirtirna (financial literacy campaign) ṭum 19 buatsaih a nih thu tar lan niin, line department-te nena ṭang hovin bank-te'n FLC tam zawk buatsaih turin hma la se, tih a ni a. Bank-a mipuiin sum an dah luh (deposit) zat za zela bank-in mipuia sum an puktir (credit) zat chhutna, Credit/Deposit Ratio-ah Kolasib District-a bank-te chuan December 2023-ah CD Ratio 67.73% an nei tih tar lan niin, December 2022 nen khaikhinin CD Ratio hi 12.06%-in a pung a ni.

Kum 2023-2024 sawrkar kum chhunga Kolasib District chhunga bank-te'n loan an pek chhuah dan tur, Annual Credit Plan (ACP) ruahmanah December 2023 thlenga bank-in an pek chhuah tawh zat chu 50.30% a ni a. Pradhan Mantri Mudra Yojana (PMMY) hnuaiah MUDRA loan 2,514 (₹ nuai 2,406.06 hu) pek chhuah tawh a ni a; Kisan Credit Card (KCC) hnuaiah kut hna thawk, ran vulh leh sangha khawitute tan loan 4,711 (₹ nuai 5,774.35 hu) pek chhuah tawh a ni a; PMEGP, NRLM leh NULM kal tlanga sawrkar sponsor scheme hnuaiah loan 125 (₹ nuai 616.39 hu) pek chhuah tawh a ni a; micro, small & medium enterprise hnuaiah loan 2,356 (₹ nuai 7,173.98 hu) pek chhuah tawh a ni bawk.

He hunah hian bank leh mipui sum vawn himna (security) lam te pawh sawi ho a ni a. RBI-in ₹ 2,000/- (cheng sang hnih) note tlang a hnuh kir chungchang pawh tar lan niin, ₹ 2,000/- tlang hi bank-a thleng theih hun a tawp tawh a. RBI-in India rama Issue Office 19 a puanahte chuan la thleng theih niin, heti ang thleng tur nei chuan dak (post) kal tlangin dilna lehkha nen Issue Office-ah hian thawn tur a ni a; a thlengna pawisa chu bank account kal tlangin a lut dawn a ni. Mizoram tana Issue Office hnai ber chu Guwahati a ni a. Hemi link-ah hian a tih dan tur chipchiar chu a en theih ang. https://m.rbi.org.in/Scripts/BS_PressReleaseDisplay.aspx?prid=56672