4502/2025-2026

Kolasib, the 17th February 2026: Vawiin khan DC Conference Hall, Kolasib-ah District Consultative Committee (DCC) leh District Level Review Committee (DLRC) December Quarter Ending thutkhawm neih a ni a. He hun hi Pi B. Malsawmtluangi, Addl. Deputy Commissioner, Kolasib chuan hmanpuiin a kaihruai.

He hunah hian meeting hmasa Minutes pawmin a bawhzuina (ATR) te thlirlet nghal a ni a. Kolasib District chhunga Bank hrang hrangte hmalakna leh dinhmun thlirho niin, Banking Parameters pawimawh zual - Deposit, Advance leh Credit-Deposit (CD) Ratio dinhmun te zirchian a ni.

Meeting-ah hian Annual Credit Plan (ACP) hnuaia Priority leh Non-Priority Sector-a hmalakna hrang hrang te, sawrkar laipui scheme - PMEGP, KCC, MUDRA leh a dangte bawzuina te leh mipuite hamthatna tur Social Security Schemes (PMJJBY, PMSBY, APY) enrollment dinhmun te uluk taka thlirho a ni bawk.

Bank hrang hrangte report ngaihthlak a nih hnuah hmalakna inang lo te sawiho a ni a. Bank thenkhat, a bikin SBI leh Rural Bank lamah Agriculture hnuaia ACP disbursement a that laiin, bank thenkhat erawh chuan dilna (applicants) an hmuh loh avanga pek chhuah nei meuh lo te pawh an awm a. Hei bakah hian Other Priority Sector leh MSME disbursement-ah te pawh bank hrang hrangte achievement dinhmun a inthlau hle tih tarlan a ni. Heng bakah hian Loan rulh that loh (NPA) dinhmun te pawh sawiho a ni.

Meeting kaihruaitu Addl. DC Pi B. Malsawmtluangi chuan Department leh Bank te inkarah inhriatthiamna leh thawhhona tha a pawimawh thu a sawi a. Bank hnathawkte an buai em avangin leh applicants an dawn thin loh avangin Line Department te chu tan la tur in a chah a. Bank leh Line Department ten loneitute hnenah eng loan te nge awm tih leh engtianga dil tur nge tih te lo hrilhhria a, awareness pek kawnga hma la turin a chah a, Financial Year thar lo awm turah Quarter ending-ah result tha zawk neih a nih theih nan theihtawp chhuah tlang turin kalkhawmte chu a sawm nghal bawk a ni.

Vawiin thutkhawm hi Pu Thuamzamung Tunglut, Lead District Manager (LDM) chuan lawmthu sawina neiin hun khar a ni.