2277/2023-2024

2023 Khuangchawi thla ni 12: Vawiin khan Mizoram Legislative Assembly Inthlanpui, 2023 lo awm tur chungchangah Kolasib District Election Officer Pu John LT Sanga hovin Kolasib DC Conference Hall-ah District election official-te leh political party hrang hrang hruaitute inkawm hona hun buatsaih a ni.

Kolasib DEO Pu John LT Sanga chuan political party hruaitute chu MLA Inthlanpui, 2023 buatsaih turah inthlanna felfai leh thianghlima a awm theih nana tan la turin a sawm a. Model code of conduct puan a nih atanga political party-te'n an tih loh tur thil chi hrang hrang sawiin, MCC chu uluk taka chhiar a, zawm theuh turin a chah a. MCC an hriat chian chuan kal sual leh tih sual lakah an fihlim thei dawn a ni, a ti. DEO chuan election expenditure chungchangah pawh felfai taka kalpui turin party hruaitute a chah a. Model code of conduct chuan rorel lai party leh party dangte pawh dinhmun inang tlang leh rualkhai taka cheibawl a tum ber thu a sawi.

Kolasib DEO chuan party flag tar chungchangah mimal ina tar a nih dawnin in neitute phalna lak hmasak a ngaih thu te, vantlang hmunah leh sawrkar hmunhma leh building-ah te tar phal a nih loh thu te; political party-te'n vantlang inkhawm leh rally an huaihawt dawnin darkar 48 hmain ‘Suvidha App’ kal tlanga phalna an lak a ngaih thu te; vantlang mipui pun khawmnaah au rinna hman a nih dawnin phalna lak a ngaih thu te; MCC hman chhungin Minister-te leh MLA-te pawh sawrkar guest house-ah darkar 48 chhung chauh an awm theih thu leh a aia rei an awm dawn chuan dil belh a ngaih thu te; campaign-naah mimal nun hawia inbeihna lam khap tlat a ni thu te; party infak mawina video tihchhuah a nih dawnin MCMC-ah endiktir hmasak a ngaih thu te; campaign-naah India Flag hman phal a nih loh thu te a tar lang a ni.

He inkawm honaah hian Tuirial bial returning officer Pi Melody Ngurthantluangi, Serlui bial returning officer Pu Lalmuan Puia, Election Officer Pi Christina Lalmuanzuali leh ARO-te leh political party hrang hrang hruaitute an tel a. MLA Inthlanpui 2023 buatsaih tur chungchanga thil pawimawh hrang hrang sawi hona hun hman a ni.