874/2026-2027

Kolasib, 5th June, 2026: Vawiin chawhnu  khan Kolasib DC Office Conference Hall-ah District Level Green Mizoram Day Committee te chu an thukhawm a. He thutkhawm hi District Level Green Mizoram Day Committee Chairman leh Kolasib Deputy Commissioner ni bawk, Pu H. Dolianbuaia'n a kaihruai a.

State sawrkar ruahmanna siam angin kumin Green Mizoram Day hi lo awm tur June ni 11-ah hman turin an rel a ni.

Thutkhawm kaihruaitu Pu H. Dolianbuaia chuan thu sawiin, Green Mizoram Day kan hman thinnaah thingtiak tam tak phun tawh thin mah se, a hnu lama enkawl zui a nih loh thin avangin a nung chhuak an tlem thin hle a ni, a ti. Chuvangin, kuminah chuan department tin ten an thing phun thlante uluk takin enkawl zui se, a tinung thate hnenah lawmman siam pawh a thain a hlu hle ang a ti a. Thing phun uar a tul rualin, a mawi leh tangkai tur lam thlan thiam a pawimawh thu a sawi bawk.

He hunah hian Pu Aniket P. Goanker, IFS, DFO Kolasib hnen atangin nikum lama Green Mizoram Day hman dan report ngaihthlak a ni a. Nikum khan Green Mizoram Day hi Thingdawl Community Hall-ah Deputy Speaker Pu Lalfamkima khuallian nena hman a nih thu leh, hemi hnu hian JNV Thingdawl-ah thingtiak phun a nih thu a tarlang a. JNV Thingdawl-a thingtiak phun zinga 87% vel chu a nung tha a ni tih a tarlang.Vawiin thutkhawm hian kumin Green Mizoram Day 2026 hman dan tur hetiang hian a rel a ni a .A hawnna program hi Parish Hall, Kolasib-ah June ni 11, 2026 chawhma dar 10:30-ah neih a ni ang a,Khuallian atan Kolasib Bialtu MLA leh Deputy Speaker ni bawk, Pu Lalfamkima chu beisei a ni.

He hunah hian kumin Fire Prevention Week hman chhunga kangmei ven kawnga hma la tha khuate hnenah lawmman hlan a ni ang a, thing phun hnatlang bikah, tlemte phuna hawnna (Ceremonial Planting) hi Kolasib Sports Stadium-ah neih a ni ang a, a huhoa tam tak phunna (Mass Plantation) erawh KVK Kolasib-ah neih a ni thung ang.