1335/2026-2027

Kolasib, 8th July, 2026: Vawiin khan Kolasib Bawrhsap leh District Level Monitoring Committee (DLMC) Chairman ni bawk, Pu H. Dolianbuaia kaihhruaiin DLMC thutkhawm neih a ni a. He hunah hian National Highway laihzau leh siamthat meka Vairengte atanga Mualkhang inkar (Package 3 atanga Package 7) huam chhunga leivung paihna tur, Muck Disposal Plan, EPC Contractor ten an rawn thehluh chu ngun taka sawiho a ni.

Meeting-ah hian EPC Contractor ten Package tin atana leivung paihna tur hmun (muck disposal site) an lo duanlawkte chu thlirho a ni a. Hmun thenkhat chu thutkhawm hian a pawmpui  nghal a, hmun thenkhat erawh chu uluk zawka enfiah tha leh tura ruahman a ni. Leivung paihna hmun (muck disposal site) thlan felahte hian hriattirna signboard tar ngei ngei turin thutlukna siam a ni bawk.

DLMC Member Secretary, District Forest Officer (DFO) chuan rawtna siamin, leivung paihna hmun reng rengah leivung paih hmain a venna (protection wall) siam hmasa phawt thin turin contractor te hi a hrilh a. Mizoram Pollution Control Board atanga palai kal pawhin, leivung paih fimkhur loh hian lui leh tuihnate a tihnuin a tichhiat theih avangin fimkhur taka leivung paih hna thawk turin contractor te a chah a ni.

Thutkhawmah hian Village Council (VC) aiawh lo kal ten contractor ten fimkhur tawk lova leivung an paih vanga harsatna an tawh thinte chu Chairman hnenah an thlen a. Chairman chuan contractor te chu fimkhur taka hna thawk tur leh ruahmanna siam (muck disposal plan) anga a hmun ruatsaah ngei leivung paih thin turin a hrilh nghal a ni.

Hemi bakah hian kawng siamtute hnathawh dan thlirho nghal a ni a, CALA (Competent Authority for Land Acquisition) in mipuite hnen atanga ngenna leh vuivaina (complaints) hrang hrang a dawn thinte sawichhuakin, hmalam hunah uluk leh fimkhur zawka hna thawk tawh turin contractor te hi hriattir leh ngen an ni bawk.