2042/2026-2027

Kolasib, 2nd September, 2026: Vawiin chhun dar 1:00 khan Kolasib Police Station-ah Kolasib Bawrhsap leh NCORD Chairperson ni bawk Pu H. Dolianbuaia kaihhruaiin District Level Narco Coordination Centre (NCORD) thutkhawm neih a ni a, he mi hnu hian ruihhlo man khawmte tihralna (Pre-Trial Disposal of Drugs) hman zui nghal a ni.

Thutkhawm kaihruaitu Bawrhsap Pu H. Dolianbuaia chuan thu sawiin, NCORD meeting neih thin pawimawh zia a tarlang a. Vawiina ruihhlo man khawm tihral turte thlirin, heng ruihhlote hi thalaiten ruih nan lo hmang ta se mi engzat takin nge an nunna leh hmalam hun chan ang tih ngaihtuah heti zah an man thei hi a lawmawm takzet a ni a ti. Ruihhlo dona kawnga theih tawp chhuahtute chungah lawmthu sawiin, "Kolasib chu state dang nena ramri hrula awm kan nih avangin sualna ngampatna leh ruihhlo tawlhrukna (transit route) atana hmun remchang kan ni a. Chuvangin ruihhlo do tur hian sawrkar chauh ni lovin, tlawmngai pawl leh khawtlang mipuite kan thawhho chhunzawm zel a ngai a ni," a ti.

Pu Lalrinpuia Varte , Superintendent of Police (SP) pawhin thu sawiin, NCORD thutkhawm hi thil pawimawh tak a ni, a ti a. Sawrkarin ruihhlo dona kawngah a hma zawng aiin tan a la thar nasa hle tih sawiin,  police  te thawhrimna bakah khawtlang leh tlawmngai pawl ten tha taka an thawhpuinaah lawmthu a sawi bawk.

Thutkhawmah hian NCORD member te  atangin report ngaihthlak a ni a. Police report atanga a lan danin, kumin chhungin ruihhlo vangin mi 20 man an ni a, case 12 siam sak an ni.

Heroin kg 2 leh gram 310 bakah Methamphetamine kg 21 man a ni a, hengte hi NCB rate-ah cheng vaibelchhe 25 chuang hu a ni.

Zu kaihhnawih case 15 siam niin mi 20 man an ni a, zu man zawng zawng rate hi Rs. 1,46,06,000 man hu a ni. Hemi bakah hian August thla chhungin hmun 13-ah ruihhlo that loh zia inzirtirna (awareness) neih a ni a, mi 801 in an chhim a ni.

Excise & Narcotics Department atangin report ngaihthlak a ni a, Food & Drugs lam atangin damdawi pangngai ruih atana hman theih list tarlan a ni bawk. Hei bakah hian ruihhlo ngaite enkawlna  hmun, TNT leh Golgotha, Vairengte atangin report ngaihthlak a ni a. TNT report-in a tarlan danin, tun dinhmunah mipa 344 leh hmeichhia 77 enkawl lai an awm a, heng zinga 388 te hi Kolasib district pawn atanga rawn kal an ni.

Meeting zawh hian Kolasib Police Station kawtah Drugs Disposal & Felicitation Programme hman a ni a. He hunah hian ruihhlo man khawmte chu dan ang thlapa hal ral a ni. Ruihhlo tihral takte hi Heroin kg 1.767 leh Methamphetamine (Yaba tablets) kg 12.5 niin, a vaiin kg 14.267 a ni. Heng ruihhlo hal ral takte hlutna hi NCB rate-ah Rs. 13,53,40,000 (Cheng vaibelchhe 13, nuai 53, sing 4) a ni. Hemi rual hian ruihhlo man kawnga thawk thate hnenah lawmman (felicitation) hlan nghal an ni bawk.

He hunah hian NCORD member te leh mi sawmbikte kim takin an tel a ni.