Vawiin khan Kolasib DC Conference Hall-ah Enforcement Officials te pualin Anti Tobacco kalpui mek chungchang Workshop neih a ni a. Sawrkar Department hotute, District Anti Tobacco Squad/District Level Task Force member te leh tlawmngai pawl aiawh te an tel a ni.

Kolasib DC, Kolasib District Anti Tobacco Squad Chairman ni bawk Pi Niharika Rai, IAS chuan he hun hi a hmanpui a. Thu sawiin Vaihlo leh a kaihhnawih thil dang te hi a thatlohzia vawiina naupang leh thalai ala ti ve lote uar lehzuala kan zirtir hi kan tihtur a ni, a ti a. Kan tihdan phung thalo ti danglam turin kan rilru puthmang kan thlak a tul a ni, a ti. Zau zawka Zuk leh hmuam dona a hlawhtlin theih nan Function nei tur ten District thuneitute hrilh thin se, chutah chuan zuk leh hmuam thatlohzia hi puanzar thin nise, a ti a. Khauh lehzuala Kolasib Anti Tobacco Squad ten hma lak tul a tih thu leh Vaihlo zuartu Dawrkai ten a hlauhawmzia tihlanna Pictorial Warning an tar lo a nih chuan dan anga action lak vat a nih tur thu Pi Niharika Rai chuan a sawi a ni.

Dr. Jane R.Ralte, State Nodal Officer, Mizoram State Tobacco Control Society chuan The Cigarettes and Other Tobacco Products Act (COPTA) chungchang leh Mizorama he dan hman mek chungchang Power Point presentation hmangin a sawi a. Mizoramah hian zuk leh hmuamin zung a kaih thuk avang leh a thalo tih hre reng chunga meizu leh vaihlo atanga thilsiam hmangtu kan tam avangin he dan hman mek hi chak lehzuala kalpui a ngai a ni, a ti a. Zu lo theilo te pawhin a zukna hmun kan hriat a, midang tibuai lova kan tih theih nan zirtirna hi uar ala ngai hle a ni, a ti. Naupang leh kum 18 hnuailam hnena Vaihlo hralh phal loh tithe hi fimkhur leh dik takin kalpui ila, naupang ban phakah Vaihlo atanga siam ei chi te thil zuartuten dah lo bawk se, a ti a. Vaihlo dona hi khawtlang leh hnam tana thil tha a ni tih hre tlang vek ila, Anti Tobacco Squad te tihtur chauh nilovin kan zavaia tanhona tur a ni, Dr. Jane chuan a ti a ni.

Kolasib District Anti Tobacco Squad tehian kum hnih kaltaa a din atangin Office leh sawrkar hmun te tum 3 an fan hnuah chauh dan bawhchhetute pawisa an chawitir tan a. May 31, 2012 thleng khan mi 31 an manin an chawitir a ni.

Dr. Sangthuama Ngente, CMO, Kolasib-in inkhawm hi a kaihruai a. Dr. Lalramliana, District Medical Superintendent/Member Secretary, District Level Task Force chuan Anti Tobacco Squad te chet dan leh an hlawhtlinna te a sawi bawk a ni.