Faina Hapta, 2016 chu tukin khan Kolasib Vanglai Mahatma Gandhi lim bulah hawnna hun hman niin, Pu H. Lalengmawia IAS District Bawrhsap in a hawng.

Faina Hapta hawnna inkhawm Pu Albert Vanlaltluanga, DUDO kaihhruaiah hian Bawrhsap chuan Kolasib District-ah faina ngaihpawimawh a ni zel chu lawmawm a tih thu a sawi a, Faina tih hian pawn lam faina mai piah lamah chhungril faina ngaihpawimawh a tul thu sawiin, kan biak Pathian a thianghlim angin keini pawh kan rilru, taksa a thianghlim tur a ni a ti. Faina hian hriselna a thlen a, hriselna chuan hmasawnna, hriatna leh finna a thlen a ni a ti bawk. Chhungkua, khawtlang hmasawn tur chuan fai a ngai a ni a ti a. Ran vulhtu te pawh thenawm te tan hnawksak lo zawng a vulh turin a chah a ni.

Hawnna inkhawmah hian Pu C. Lalzahngoa, SP; Pu R Lalremsanga Addl. DC leh Pu F. Lalsanglura Sr. E.E. PHED te pawhin faina thuchah an sawi a. Mahatma Gandhi zahna lantirna pangpar a limah hian DC, SP leh DUDO ten an dah nghal a ni. DC ho hian khawlai phiah fai entirna neih nghal a ni.

Faina Hapta pual hian Zirna In, Sawrkar Office, Veng, Thingpui Dawr leh Hotel leh Home fai lawmman siam a nih dawn bakah, thupui thlan bik hmanga Essay inziahsiak leh Hla inphuahsiak te siam a ni.