Vawiin khan Kolasib DC Conference Hall ah Kolasib District a faina hapta hman dan tur relin Department hrang hrang hotute leh Khawtlang hruaitu hrang hrangte chu Pi PC Zonuntluangi, DUDO kaihhruaina hnuaiah an thukhawm.

UD&PA Minister Pu Zodintluanga chuan Faina Hapta hi October ni 2 zing dar 8 ,Vanapa Hall, Aizawl ah a hawng anga, he hunah hian Mizoram pum District zawng zawnga faina hapta hmanna tur khua thlanchhuah te atangin mi 10 aia tamlo an kalkhawm dawn a ni.

Faina Hapta hi Directorate atanga inkaihhruaina duan anih anga hman tur niin heng Essay inziahsiak, Debate, veng fai, Office fai, School fai, Hotel/restaurant fai te enendik an ni anga, henga a titha zual te chu lawmman pawisa fai leh citation hlan an ni ang.

Kolasib ah chuan Sawrkar Office hrang hrang endik turin Sub-Hqrs YMA, MUP leh MHIP President te ruat an ni a, Middle leh High Sikul endik turin College Veng, Venglai leh Hmar Veng VCP te ruat an ni a, Primary Sikul endik turin Vengthar, Saidan leh New Diakkawn VCP te ruat an ni. Kolasib khawpui chhunga Veng hrang hrang endik turin Pu R.Lalhmingthanga MJA President, DAO leh SDO(PHED) te ruat an ni a, Hotel leh restaurant fai endik turin Dr.Lalthlamuana SMO, Pu Vanlalnghaka CZS/DDK leh Pu Zomuanpuia, Editor Kolasib Aw te ruat an ni.

Faina Hapta hi Kolasib District ah hian Kolasib Khawpui bakah  Vairengte, Kawnpui leh Bairabi ah hman tur niin Kolasib baka khaw Pathum ah te hi chuan SDO(c) leh SDC te kaihhruaina hnuaiah a hman dan rel tur ani. Faina Hapta hman nan hian UD&PA Department chuan Kolasib khawpui tan cheng 1,30,000/- Vairengte tan cheng 50,000/- kawnpui tan cheng 50,000/- leh Bairabi tan cheng 50,000/- a pechhuak a ni.

Bawrhsap Dr.Arun T,IAS chuan lawmthu sawiin hnu a khar a ni.