Tukin zing khan Kolasib-ah Fire Prevention Week 2012 chu DC Pi Niharika Rai, IAS, in a hawng a. Hawnna thu sawiin District chhung mipui te chu kumin thal chhova kangmei tichhuak lo tur leh kangmei laka vengtu ni theuh turin a sawm.

DC Office kawttuala Week hawnna inkhawm neihah hian Pi Rai chuan, Thlasik thal kan hman mek lai hian kangmei a chhuak duh hle tih sawiin mei chhuak za-a 90 hi kan fimkhur loh vang leh kan inthlahdah vang a ni a. Tihdam aiin ven a tha anlo tih fo thin angin mei chhuak tur vengtu nih i tum theuh ang u, a ti a. Kangmei kan thelh thei vek lo, mahse a chhuah loh nan kan fimkhur tur a ni, a ti. Pi Niharika Rai chuan, kangmei chhuak thin hi Lo hal mit lova kalsan, gas, Mombati chhit, meizial bung paih, mei chhemna thuk mit lo leh electric wiring dik lo avanga thleng fo thin a nih avangin hengah te hian kan fimkhur hle a tul a ni tiin Sawrkar dan siam zawm ila, hun bituk chhung March 15 hmalamah ngei Lo i hal vek ang u, a ti a. Meilam sial pawh kum dang zawng aiin i uluk ang u, a ti a ni.

Fire Prevention Week hawnna inkhawm hi Pu Lalrinmawia Ngente, Secy, Kolasib Sub Hqrs YMA chuan a kaihruai a. Pu Lalthlamuana Pachuau, DFO, Kolasib chuan report pein Week hman chhunga chet thawh dan tur kawng hrang hrang a tlangzarh a. Tih dan thin angin Ram kang veng tha ber khua thlan leh a ni dawn a, Ram kang a awm thulha thahnemngai taka thelh tura thawk chhuak turin VC/YMA te chu ngen an ni a, thal zual lai thla hnih chhung atana thawk tur Fire Watcher khaw tinah 1 theuh rawih leh an ni dawn bawk a, Chanchinbu mipui hnena zirtirna thu ziak tha hnenah lawmman siam a ni leh dawn bawk a ni. Heng thute hi puangzarin DFO chuan District chhunga kan ram ngaw neihte mualpho taka kangmeiin a tihchereu loh nana tan la theuh turin mitin te a sawm a ni.

Pi Vanlalchhuangi, Hony. Wildlife Warden & President Sub Hqrs. MHIP pawhin thuchah sawiin Mizoram hi kan ram neih chhun a ni a. Kumtina kangmeiin min run avang hian thlaler ramrovah zawi zawiin kan inhnuklut mek a ni tih hriain tan i la thar ang u, a ti a ni.

Week hawnnaah hian Sawrkar hnathawkte , NGO leh sikul naupangte an tel tha hle a ni.