3915/2023-2024

2024 Ramtuk thla ni 21: Vawiin chawhnu dar 1 khan Kolasib District Level Coordination Committee under District Management Unit (DMU) chu an Chairman, District Bawrhsap Pu John LT Sanga kaihhruaiin Kolasib DC Conference Hall-ah an ṭhu khawm a. FOCUS (Fostering Climate Resilient Upland Farming System) hnuaia hma lakna hrang hrang thlir hovin, hma lakna tur ruahmante an pawm bawk.

He hunah hian FOCUS Kolasib District Project Manager Pu Lalremruata chuan meeting neih chhan a sawi fiah a. Kolasib FOCUS-in Land Based Activities-ah 3rd leh 4th quarters atan fund an dawn loh thu te, Livestock Sector-ah pawh 2nd quarters-a sum an dawnte pawh MLA inthlan a awm avanga hma lakna an kalpui theih lawk loh thu te sawiin, an hma lakna tur chu DLCC-in a pawmpui a ngaih thu a sawi a ni.

Kolasib District AH & Veterinary Officer Dr Lalsanglien Ralsun chuan Livestock Sector atana hma lakna tur ruahmanna awm sate a tar lang a. Kel vulh tura thlan (goatery unit) chhungkaw 50 hnenah kel no 2 ṭheuh sem tur leh vawk vulh tura thlan (pig breeding unit) chhungkaw 200 hnenah vawk no 2 ṭheuh pe tura ruahman a nih thu a sawi a. Ran an sem tur hi a leina tur a dawngtu turte account-ah thunsak tum a nih thu sawiin, hemi atan hian DLCC remtihpuina mamawh a nih angin meeting chuan a remtihpui a ni.

He hunah hian FOCUS-in 2023-2024 chhunga Land Resources, Soil and Water Conservation Sector; Horticulture Sector leh Agriculture Sector hnuaia hma an lakna report te tar lan a ni bawk a. Animal Health lama hma an lakna te pawh tar lan niin, vawk 4,316 chu Classical Swine Fever hri danna pek a nih thu te, ran 722 chu Lumpy Skin Disease venna pek a nih thu leh kel 228 chu kel natna laka venna (Goat PPR) pek a nih thu te tar lan a ni a. Vawk 1,411 kah rai aṭangin vawk note 5,275 a pian thu tar lan a ni bawk.