Kolasib District Level Committee on Green Mizoram chu an Chairman Pu Dawngliana, DC hovin vawiin khan Kolasib a D.C.Conference Hall-ah an thukhawm a, June 16 a thingphun runpui neih dan tur an rel.

Ruahman ang chuan zing dar 10:00 ah D.C.Office kawttualah ceremonial planting neih a ni ang a. Hemi hnu hian sawrkar department hrang hrangte chuan anmahni office kawtah a tul dan angin thing an phun ang. Sub-Division pahnih Vairengte leh Kawnpui bakah Block Level ah te committee siamin he ni hi hmang turin vawiina Kolasib District Committee on Green Mizoram thukhawm chuan a rel bawk a ni.

Forest Department chuan Serkhan khaw hnuai ram kanna hmunah uar taka thing phun a tum dawn bawk a, Vairengte khaw tui lakna ber, ram kang avanga tui hna tha tawh lo pawh tui hna a lo tam leh theih nan uar taka thing phun thar an tum bawk. Khaw tina YMA te chu he hunah hian hnatlang kova tul an tihna apianga thing phun tura beisei an ni bawk a, V/C tinte chu safety reserve leh supply reserve din thar leh tura tih an ni dawn bawk a ni.

Thingphun turte hi Kolasib Diakkawn a DFO Office atanga lak tur a ni dawn a, mimal mahni in bula thing phun dah turte pawhin an la thei ang. Thing tiakte hi Ngiau, Khuangthli leh Herhse an ni tlangpui ang.

Rengte Tlangsang, Saidan  Sports Complex leh Thingdawl a District Park ah te uar taka thingphun turin YMA leh Scouts & Guides te chu beisei an ni dawn bawk a ni.