2684/2024-2025

Dated Kolasib: the 25th October, 2024:  Nimin khan Deputy Commissioner’s Conference Hall, Kolasib-ah halpuah hal, halmawi hal leh naupang silai lem (amu kap chhuak thei) khap dan tur chungchangah thutkhawmna neih a ni a. Pu Robert C. Lalhmangaiha Deputy Commissioner, Kolasib chuan he hun hi a kaihruai a. Sr. SP Pu David H. Lalthangliana bakah Sawrkar hotu pawimawhte, Kohhran hruaitu aiawh leh VC leh NGO aiawhte an tel.

Pu Robert C. Lalhmangaiha, Deputy Commissioner, Kolasib chuan hunpui Krismas leh Kumthar a lo thlen hian halpuah leh halmawi nasa takin kan hal fo thin a, hun hmasa lamah pawh sawrkarin hma a lo lak fo tawh thin thu a sawi a. Hlawhtling taka khap a lo nih tawh thin rualin, a changa han inthlah dul chang a awm thin thu a sawi. Sawrkar thar kan nei ta a. Tuna kan Sawrkar chuan hneh taka khap a duh a ni a ti. Ho taka sum khawh ralna a nih thu leh boruak tibawlhhlawh theitu a nih dante leh a tihthianghlim loh dan a sawi a bawk a. Kum upa lam te, chak tawk lote tan leh damlo, natna tuarte tana thil pawi a thlen theih dante a sawi bawk. Tin, kangmei tichhuak thei leh inhliam theihna a nih bakah, thihna hial thlen thei a nih thu tarlan a ni bawk.

Nimina thutkhawmah hian Kolasib District huamchhunga halpuah, halmawi leh naupang silai lem (amu kap chhuak thei) khap dan tur chungchang ngun taka ngaihtuahho a ni a. District luhka, heng - Vairengte, Saiphai, Phaisen leh Bairabi check-point ahte hian uluk taka Excise leh Police lamin lo check tura rauhman a ni a. Kolasib khawpui leh District chhunga Sub-Division hrang hrang huamchhunga Kohhran tinte hnenah halpuah leh halmawi hal lo tura ngenna semchhuah dan turte, District Bawrhsap leh Superintendent of Police kaihhruaina hnuaia VC, YMA-te leh NGO dangte nena hmalak dan tur sawiho a ni a. Diwali denchhena halpuah leh halmawi hal lo tura ngenna siam hmasak thu pawh rel a ni. Hun remchangah Police, VC leh YMA lamin halpuah, halmawi leh naupang silai lem (amu kap chhuak thei) dawrkai ten an kawl leh kawl loh thlithlai tura ruahmanna siam a ni bawk a. He Meeting hian Krismas leh Kumthar vuakveta Dan leh Thupek kenkawh dan tur leh mipui vangtlangin muanawm taka Hunpui kan hman theihna tura, a rang lama thutkhawm leh ni se tih a rel nghal bawk.

Halpuah hal, halmawi hal leh naupang silai lem (amu kap chhuak thei) khapna thupek hi ni 23rd September, 2024 khan Kolasib District Bawrhsap leh District Magistrate ni bawk chuan Section 163 of BNSS tlawhchhanin, a lo tichhuak tawh a ni.