1990/2025-2026

Dated Kolasib the 4th September 2025: Vawiin khan SIRD&PR Hall Kolasib ah village council election a hmeichhe VC thlan tlin te tan leadership training buatsaih a ni a. He hun hi Pu Lalfamkima, Deputy Speaker, Mizoram Legislative Assembly chuan a hmanpui a ni.

He hunah hian Khuallian, Pu Lalfamkima chuan thu sawiin, hmeichhe tha tak tak khawtlang aiawh a thlan tlin an ni chu a lawmawm takzet a ni, a ti a. Kalkhawmte chu mipui thlan tlin, mawhphurhna sang tak nei an ni a, an mawhphurhna chuan khawtlang siam that te, khawtlang sum enkawl te leh hmasawnna kawng hrang hrang a ke pen pui te a keng tel tih an hriat a pawimawh a ni a ti.

Pu Lalfamkima chuan hmasawnna atana ralthuam tha ber chu hriatna leh thiamna a ni tiin, Sawrkar kalphung hriatna kawngah te, khawtlang sum enkawl thu ah te leh central leh state scheme kan bial atana tangkai tur te kan hriat a kan hman tangkai zual zel theih nan inchher hriam a pawimawh hle a ni, a ti a. Vawiina an training chuan hmeichhia te dinhmun chawisan a a awm zual zel theih nan leh chanvo leh hamthatna tha zawk te an chan theih nan rah tha chhuah se tih chu a duhthusam a ni, a ti.

He hunah hian, khualzahawm, Pi B Malsawmtluangi, Addl DC Kolasib pawhin thu sawiin, India ram a ram relbawlna kawnga hmeichhe dinhmun dawmkanna bulpui chu 73rd amendment Act a Panchayati Raj in hmeichhia te tan reservation a siam chu a ni, a ti a. Chumi hnu chuan zawi zawiin hmeichhiate ram rorelna ah an lo tel chho zel a, mizoram ah pawh hmeichhiate dinhmun in hma a sawn hle a, tun dinhmunah pawh MLA 3 lai an nei mek a, women reservation bill a taka an hman hnu phei chuan hei aia hmasawnna lian zawk hi an hmu ngei dawn a ni, a ti a. Hmeichhiate chu mawhphurhna pek annih chuan an rintlak zia sawiin, hmeichhiaten in lamah an chhungkua felfai taka an enkawl ang hian ram rel bawlna pawh felfai leh tha takin an enkawl theih a ring tlat a ni, a ti.

He hun hi Pi R Zomuanpuii, President All Mizoram Elected Women Representatives AMEWR chuan a kaihruai a. Hun hi Chawhma leh chawhnu a then niin, Chawhma lamah Khuallian leh khualzahawm te atanga thusawi ngaihthlak niin chawhnu lamah technical session neih a ni a, Pi Baby VL Ruatkimi, Advocate atanga in dan leh hrai chungchang leh NALSA schemes hrang hrang te chungchang inhrilhhriatna hun hman a ni. Technical session chhawng hnihna ahhian Pu H Vanlalthanga, OC Kolasib leh Pu ZR Thafala Principal, ETC SIRD&PR Kolasib atangin zirtirna ngaihthlak a ni bawk.

Vawiin hunah hian Kolasib khawpui chhunga party hrang hrang atanga hmeichhe VC thlan tlin te an kalkhawm a ni.