930/2024-2025

Dated Kolasib the 24th June, 2024: ICAR Research Complex for NEH Region, Mizoram Centre, Kolasib chuan Tribal Sub Plan (TSP) project hnuaiah “Sensitization Workshop on Climate Resilient Agricultural Technologies for the Sustainable Farming in NEH Region” Workshop a buatsaih a. He hunah hian Dr. S.K. Chaudhari, DDG (NRM) chu khuallian niin, Dr. V.K. Mishra, Director, ICAR Research Complex for NEH Region, Umiam; Pu John L.T. Sanga, Deputy Commissioner, Kolasib District; Dr. G. Kadirvel, Director, ICAR-ATARI, Zone-VI, Guwahati; Dr. K. K. Baruah, GB member, ICAR & Former Head, DAFS, ICAR, Umiam leh Dr. S. Hazarika, Principal Scientist & Nodal Officer (TSP), ICAR, Umiam, te khualzahawm niin, he hun hi an hmanpui a ni. 

Dr. Sunil Doley, Head of Regional Centre, ICAR Mizoram Centre, Kolasib chuan mikhualte lawmna thu sawiin, Dr. S.K. Chaudhari, Hon’ble Deputy Director General (NRM) chu state sawrkar leh mipuite tan mi tangkai tak anih thu sawiin, sik leh sa mila thlai chin leh enkawl thiamna a thurawn pek kawngah a thawh hlawkzia a sawi.

Khuallian Dr. S.K. Chaudhari chuan ICAR Mizoram centre-in Workshop an buatsaih thei hi a lawmpui a, sik leh sa inthlak avanga harsatna tikiam tura ICAR-in India ram puma hma an lak nasat thu a sawi bawk a. Sik leh sa mila ran leh thlai enkawl dan mumal zawk nei turin state thuneitute, dan duangtu leh kut hnathawktu pawl hrang hrangte thawhho hi tun huna pawimawh ber a ni a. Hei mai ni lovin sik leh sa inthlak danglam chho zelin thil nung chi hrang hrangte inkungkaihna (Ecosystem) a tihchhiat chhoh mek zel avangin sik leh sa inthlak danglam chho mila thlai chin bakah boruak leh leilung tichhe lo zawnga hma kan lak thiam a pawimawh thu a sawi.

Dr. V.K. Mishra, Director, ICAR, Umiam, Meghalaya pawhin loneitute hamthatna kawnga ICAR Mizoram Centre pawimawhzia tarlangin, sik leh sa inthlakin lo neih dan mai ni lo mihring nunphung thleng pawha nghawng a neih nasatzia sawiin, huan thlai buaipuitute mai ni lo, dan duangtute leh ram hruaitute thlenga a do letna lama hma lak a ngaih thu a sawi a; chumi tur chuan chemical hmang loa thlai chin (organic farming) leh thil nung awmsa tichhe lo thei ang bera thlai chinte a pawimawh a, hemi kawngah hian sum leh pai pawh seng hreh lo turin sawrkar lam pawh a sawm bawk.

Dr. G. Kadirvel, Director, Director, ICAR-ATARI, Zone-VI, Guwahati pawhin workshop buatsaih a nih avanga lawmthu sawiin, Mizoram hi India hmarchhak state zingah sik leh sa danglam awlsamna lamah pahnihna a ni a; chuvangin, sik leh sa inthlak danglam pawhin kuthnathawktute laka harsatna lian a thlen loh nan thlai chi (variety) tha leh ran chi tha, sik leh sa inthlak danglamin a tihbuai vak loh chite chin leh vulh a pawimawh thu sawiin, department hrang hrangte leh kuthnathawktute thawh hona tha neih a pawimawh a ni, a ti.

Khualzahawm Pu John L.T. Sanga, Deputy Commissioner, Kolasib pawhin thu sawiin, Kolasib district chu Mizoram luhka anih avangin district pawimawh tak a nih thu a sawi a. KVK leh ICAR te thawhpui an nawm thu leh, kuthnathawktute tana an thawh hlawkzia a sawi a, ICAR hotute lo zin chu lawmawm a tih thu sawiin, he workshop hi kuthnathawktute’n an hlawkpui ngei ang tih a rin thu a sawi bawk a ni.

Hemi huna thu sawitu dang Dr. K.K. Baruah, GB Member, ICAR & Former Head, Division of Animal & Fisheries Science (DAFS) chuan sik leh sa inthlak danglamin thlai thar leh ran vulh lam a nghawng nasat avangin hemi chungchanga workshop neih chu thil pawimawh tak a nih thu a sawi a, boruak chhe mek chu chhan hrang hrang vang anih rualin Agrilculture lama hmasawn mekna pawh hian boruak a tihchhiat tho avangin boruak tana him zawka kuthnathawh kan zir chhoh zel tul a tih thu a sawi a ni.

Dr. S. Hazarika, Principal Scientist & Nodal Officer (Tribal Sub Plan), ICAR, Umiam, Meghalaya chuan Tribal Sub Plan (TSP) chungchang tlangpui sawiin, TSP chu 1st 5th year plan atanga bul tan anih thu leh, TSP hnuaiah hian India hmarchhaka kuthnathawktu tam takte chu zirtirna pek thin an nih bakah khawl, thlai chi, leitha bakah sangha leh rante pawh pek thin an nih thu a sawi. Hemi atang hian kuthnathawktu tam takin hlawhtlinna an hmuh tawh thu a sawi bawk.

He hunah hian lehkhabu pahnih tlangzarh niin, kuthnathawktu 60 hnenah an mamawh chi hrang hrang power tiller, fu herna khawl, sangha chi, ar note bakah thildang chi hrang hrang sem chhuah a ni a. State department aiawhte, KVK leh hmun hrang hrang atangin mithiam sawm bikte an lo kal bawk a ni.

He hunah hian Dr. Lalhruaipuii, Senior Scientist & Organizing Secretary chuan lawmthu sawina neiin hun a titawp a ni.

He workshop-ah hian chawhnu lam technical session neih niin, naktukah chhunzawm a ni dawn a. ICAR atanga mithiamte leh Departments of Agriculture, Veterinary & Animal Husbandry, Fisheries, College of Veterinary Sciences & Animal Husbandry leh College of Horticulture, Thenzawl, C.A.U., Mizoram te’n zirtirna an pe dawn a ni. Hei mai bakah hian farmer-scientist interaction leh financial literacy zirtirna pek a ni dawn bawk.