India zalenna champha vawi 70-na chu vawiin khan zing dar 10-ah Tumpui Field, Kolasib-ah ropui taka lawm a ni a, Pu R.Lalzirliana, Home Minsiter chu khuallian niin hnam puanzar a pawtpharh a ni.

Pu R.Lalzirliana chuan India Independence Day vawi 70 na hmang tura kalkhawm zawng zawng te duhsakna chibai bukin, zalenna sual chhuaktu India hnampa Mahatma Gandhi te, Pandit Jawaharlal Nehru te leh midang te inpekna leh inhlanna te chu a ngaihhlut awm takzet a ni, a ti a. Kan zalenna tura tha leh zung senga ram ropui tak dintu te beisei leh hmathlir hlenchhuak turin kan zavaiin I inhlan thar theuh ang u a ti.

Khuallian chuan Kum kalta chhung leh kum kallai meka Kolasib District chhunga sorkar hmalakna hrang hrang te a tarlang a. Tun dinhmunah kolasib district-ah NLUP dawngtu mi 11,192(1st – 4th Phase) an awm mek a. MGNREGS hnuaiah job card (active) nei 17,938 awmin, Village Employment Councils 54 a awm a ni. PMAY hnuaiah kum 2015-2016 atan Rs.20.742 lakhs hmuh niin in 26 sak a ni. IWMP project 6 (paruk) kalpui a ni bawk. Supply Department hnuaiah Ration Card Digitization tluang taka zawh a ni a. Ration Card awm zawng zawng hi 20,922 a ni. July 2016 khan AAY, PHH leh Non-NFSA Ration Card hmangin buhfai 7998.05Qtls sem chhuah a ni. Kolasib district chu ‘Oil Palm District’ ti hiala hriat a nih thu sawiin Khuallian chuan kum 2015 khan Oil Palm thar chhuah zat chu 1825.552 metric ton a nih thu leh kumin june 2016 thleng khan 559.331 metric ton hralh chhuah tawh a nih thu a sawi. Ram kang tur vennaah Kolasib district chuan hma nasa taka la in, Afforestation hnuaia National Afforestation Programme-ah 85 Ha., National Bamboo Mission-ah 280 Ha. leh CAMPA (Compensatory Afforestation Fund Management & Planning Authority)-ah 1118.062 Ha te thawh zawh tawh a ni. AH&Vety hnuaia NLUP hmalakna avangin Kolasib chu vawkah a intodelh mai ni lovin, kar tin vawk puitling 20-30 khaw dangah hralh chhuah thin a ni. Cocoon tharchhuah-ah Kolasib district chuan nasa taka hmasawnin, mulberry 150kg, Eri 60.9 kg leh Muga 11,386 nos thar chhuah a ni. Serlui ‘B’ Hydel Project chhungah khaw pathum (N.Chawnpui, Bilkhawthlir leh New Builum) atanga sangha neitu mi 96 tan a khawina bawm siamsak a ni a, 505 quintal tharchhuah a ni.RKVY hnuaiah Kolasib leh Bilkhawthlir-ah Mini Feed Mill Plant siam a ni bawk.

Power tihchangtlun nan hmalak zel niin, Saiphai a NEC hnuaia Rs.623.93 lakhs senga siam 2.5MVA, 33/11 kV Sub-station chu March 2014 atanga bul tan chu 92% zawh tawh niin, zawh fel thuai beisei a ni a. Kolasib – Sihhmui 132 KV line NLCPR hnuaia thawh pawh 95% zawh tawh niin, kumin December thla hian zawh hman tum a ni. Rural Water Supply Scheme hnuaiah khaw 25-ah scheme thawh zawh niin, hna kal lai khaw 15-ah a awm bawk. District Urban Development kaltlangin Ek-in sak tanpuina mi 45 hnenah pek a ni tawh bawk. District tana rotling tur Kolasib Sport Complex, Venglai-ah Rs.2268.43 lakhs senna tur chu hmalak mek niin, 45% zawh tawh a ni. SSA Mission hnuaiah kum 2016-2017 chhungin naupang 9767 hnenah uniform grant Rs.400/- theuh pek a ni a, naupang 12,571 hnenah a thlawnin lehkhabu pek niin, Midday Meal mi 12,659 hnenah pek a ni bawk a. Zirlai hmeichhe naupang, khawsak harsa tan Residential Hostel mi 50 len theihna siam a ni bawk. Zanlawnah Rs.83.95 lakh senga sak RMSA Secondary School chu kumin academic session a hman tan turin hawn a ni bawk.

Khuallian chuan retheihna, khawsak tawk tawk na (subsistence economy) sal tanna atangin khawsakna zangkhai zawk leh zalenna kawng zawh tum a ni a, hemi tan hian Mizoram sorkar chuan New Economic Development Policy a duang a ni a ti a. NEDP hi tluang taka kalpui a nih chuan thalai rualte tan eizawnna ngelnghet tam tak a chhawp chhuak ang a, mi tam takin eizawnna tur inhlawhna ngelnghet an neih phah dawn a ni, a ti. NEDP hnuaia hmalakna hi ‘tanpuina’ ni mai lovin ‘tangpuihna’ a ni a, tang te chu an dinchhuah ngei theih nan sorkarin pui a tum a ni a ti bawk. Kuminah NEDP bul tan nan ringawt Rs.250 crores ruahman a ni.

Home Minister chuan Independence Day lawm tura kalkhawm zawng zawng te Mizoram sorkar hmalakna thlawp tura ngenin, sorkara rinna leh beiseina nghat tlattu NGO te, Kohhran te, mipui leh chanchinthar thehdarhtute hnenah lawmthu a sawi a. India ram leh Mizoram-in hma sawn a kan tu leh fate tana ram nuam leh chhenfakawm kan hnutchhiah theihnan kan zavaia kan tan tlan a ngai a ni, a ti.

Vawiin Independence Day lawmna-ah hian parade contingent 18 awmin, armed contingent 1 (1st IR Battallion) leh unarmed contingent 5 (panga), school contingent 11 (sawmpakhat) leh DIET Contingent 1 an awm a, Parade Commander hi Inspector Eldy, 1st IR Battallion, Mualvum a ni. Parade contingent titha te :-

I.Unarmed Contingent :

· Excise & Narcotics Contingent.

· NCC Girls Contingent, St.John’s HSS

· Scout & Guides, St.John’s HSS II.

School Contingent :

· JNV School, Thingdawl

· CZ Higher Secondary School, Kolasib

· RMSA Vengthar HSS.

Vawiin Independence Day lawmnaah hian Kolasib chhunga Ran khuahkhirh tha veng/ Village Council pathum; Venglai, Khuangpuilam leh Hmarveng hnenah lawmman pek a ni a. Independence Day pual hian Basketball leh Football Tournament buatsaih niin, vawiin hian lawmman hlan nghal a ni.

Tumpui Field a Independence Day lawmna hman zawh hnu hian VIP at home mi sawm bik te tan Circuit House, Banglakawnah chhun dar 12 ah neih niin, thingpui in ho a ni.

India Independence Day vawi 70 na hi Kolasib District chhunga Sub-Division leh Block-ah te hman a ni a. Kawnpui Sub-Division-ah Pu Hmingdailova Khiangte, Parliamentary Secretary in hmanpuiin, Pu PC Zoramsangliana, MLA leh MIFCO Chairman in Bairabi-ah a hmanpui a,  Pu K.Rinthanga, Parliamentary Secretary in Bilkhawthlirah a hmanpui bawk a ni.