3526/2023-2024

2024 Pawlkut thla ni 26: Vawiin khan India ram mahnia ro inrela a din ṭanna ni, Republic Day vawi 75-na chu Kolasib Sports Stadium-ah ropui taka lawm a ni a. Kolasib District Deputy Commissioner (Bawrhsap) Pu John LT Sanga chu Khuallian a ni.

Zing ni chhuah rualin sawrkar pisa leh hmun pawimawh dangah te India Ram Puanzar zar a ni a. Zing dar 9:00-ah Kolasib Sports Stadium-ah Khuallianin Ram Puanzar pawt pharhin, Ram Puanzar chibai buktu parade contingent 16 te chibai buk a chhang let a, Republic Day thuchah a sawi nghal a ni.

Khuallian Pu John LT Sanga chuan Kolasib District mipuite chu Republic Day chibai bukin, Republic Day chu India ram Danpui (Constitution) hman ṭan ni a nih thu leh Danpui chu India rama mipui rorelna sawrkar ropui tak dinna hmanrua a nih avanga a hlutzia a sawi a. Mipui rorelna leh sakhaw zalenna rama kan awm te, Dan hnuaia khua leh tui zawng zawng intluk tlang kan nihna te hi a ropuiin, a hlu hle a ni tiin, ram inpumkhatna vawng nung a, tichak zel turin kal khawmte chu a chah a. Sawrkar department-te, tlawmngai pawl, village council, kohhran, media leh mipuite thawhpuina leh ṭawiawmnaah lawm thu sawiin, Kolasib District chu Mizoram chhunga kawng eng kima district entawn tlaka siam tura ṭan lakpuiah a sawm a ni.

Khuallian chuan sawrkar kum kal mek 2023-2024 chhunga Kolasib District-a sawrkar department-te kal tlanga hma sawnna hna thawh tlangpui tar langin, an hna thawh chhuanawm a tih thu a sawi a. Kum 2023 chhungin NABARD sum hmangin Bukpui PHC building te; Vairengte CHC isolation ward te; Serkhan, Buhchangphai, Pangbalkawn, Phainuam leh Hortoki Health & Wellness Centre te sak zawh a nih thu leh khum 100 awm theihna tur District Hospital Kolasib building thar pawh sak mek a nih thu a sawi a. Samagra Shiksha hnuaiah Vairengte HSS Science Stream building thar chu sak zawh leh hawn tawh a nih thu leh Vairengtea secondary zirlai hmeichhe naupang 30 tana a thlawna awmna tur Residential Girls Hostel sak pawh hawn a nih tawh thu a sawi a. District Court Complex-a Multipurpose Building sak hna leh Project Venga Grade-I Judicial Quarters sak hna te chu thawh zawh tawh a nih thu leh Project Vengah Fast Track Court building thar sak hna thawh mek a nih thu te, RGSA aṭanga Bilkhawthlir S VC Area-a Arecanut Leaf Plate Production Centre sak chu hman theiha hawn a nih tawh thu leh Promotion of MSME Scheme hnuaiah Kolasib DIC Complex-ah Flatted Factory Complex sak hna thawh mek a nih thu te a sawi bawk.

Khuallian chuan Kolasib District-ah MGNREGA hnuaiah job card 21,066 a awm thu leh kum 2023-2024 chhungin ni 65 inhlawhna siam a nih tawh thu sawiin, MGNREGA hnuaia hna ruahman 12,330 zinga 11,721 chu thawh zawh a nih tawh thu a sawi a. Agriculture leh a kaihhnawih department hrang hrang hnuaiah kut hna thawktute leh ran vulhtute tan sum fai leh hmanruaa ṭanpuina bakah, thiam thil kawhhmuh leh kaihhruaina chi hrang hrang pek a nih dan a tar lang a. Ei leh bar, tui, eng, inkal pawhna kawngpui, chaw ṭha, hriselna leh thianghlimna leh mipui himna tur leh mipui tana hamṭhatna hrang hrang chungchanga sawrkar department hrang hrangte hna thawh leh hlawhtlinnate a tar lang bawk.

Khuallian chuan Govt Diakkawn High School zirtirtu Pu Lalthianghlima'n ram pum huap zirtirtu ṭha chawimawina, National Teachers’ Award 2023 a dawn thu te, KVK Kolasib-a Senior Scientist and Head Dr Michelle C. Lallawmkimi'n kum 2023 chhungin award pahnih – Best KVK Scientist Award leh Outstanding Achievement Award a dawn thu te tar langin, an chhuanawm a tih thu leh a lawmpui thu a sawi a. Nl. Lalremsiami, Kolasib College Veng leh Nl. Marina Lalramchuani, Kawnpui te chu Hockey senior leh junior-a India ai awh pha leh hlawhtlinna eng emaw zat hlawh chhuahpuitu an nih avangin chhuanawm a tih thu sawiin, hma sawn zel turin duhsakna a hlan bawk a ni.

Vawiina Kolasib-a Republic Day lawmna ceremonial parade-ah hian armed contingent 1, unarmed contingent 3 leh school contingent 12 awmin, St John's HSS te'n National Anthem an sak bakah, Salvation Army Kolasib Corps Band-in kal rem rimawi an tum a. Khuallianin thu a sawi zawh hian lawmman leh chawimawina chi hrang hrang sem nghal a ni.

Ceremonial parade-ah unarmed contingent-ah NCC Army Wing St John's HSS chu pakhatna niin, pahnihna NCC Air Wing St John's HSS leh pathumna Student Police Cadet Govt Chawnghmingliani Memorial HS te an ni a. School contingent-ah DIET Kolasib chu pakhatna niin, pahnihna Govt Kolasib HS leh pathumna HT HS te an ni a. 1st IR Battalion armed contingent leh parade contingent dang 9 chu participation prize hlan ni bawkin, parade commander SI R. Lalchawiliana, band leh National Anthem satu te pawh lawmman siamsak an ni bawk.

Ceremonial parade lawmman bakah hian Republic Day pual hian a hnuaia mi ang hian chawimawina leh lawmman hrang hrang sem a ni bawk a. Khuallian Pu John LT Sanga'n a dawngtute kutah a hlan a ni.

A. Lawmpuina leh chawimawina:

1. National Teachers' Award 2023 awardee: Pu Lalthianghlima, Teacher, Govt Diakkawn High School

2. 67th National School Games 2023-2024 Boxing Boys U-17 2nd Position: Hmingthanzuala, Class-X, Jawahar Navodaya Vidyalaya, Thingdawl

B. UD&PA Department hnuaia Fai Intihsiakna:

1. Veng fai inelna:

Pakhatna - Project Veng, Kolasib

Pahnihna - College Veng, Kolasib

Pathumna - Venglai, Kolasib

2. Office fai inelna:

Pakhatna - Irrigation & Water Resources Department, Kolasib Division

Pahnihna - Public Health Engineering Department, Kolasib WATSAN Division

Pathumna - Excise & Narcotics Department, Kolasib

3. Primary/middle school fai inelna:

Pakhatna - Govt Chawngfianga MS, Saidan

Pahnihna - Govt LCM PS-XI, Project Veng

Pathumna - Govt Thingdawl MS

4. High/higher secondary school/college fai inelna:

Pakhatna - Govt Hmarveng HS, Kolasib

Pahnihna - School of Nursing Thingdawl, Kolasib

Pathumna - Govt Diakkawn HS, Kolasib

5. Hotel/restaurant/tea stall fai inelna:

Pakhatna - Blue Door, Banglakawn

Pahnihna - Tashi Delek, Venglai

Pathumna - Wok N Pan, Diakkawn

Vawiina Kolasib-a Republic Day lawmnaah hian sawrkar official-te, ex-servicemen-te, political party leh tlawmngai pawl hruaitute, chanchinbu mite, lawmman dawngtute, zirlai leh mipui ṭhahnem tak an tel a. Muala hun hman zawh hian, chhun lamah Kolasib Bawrhsap Bangla-ah 'VIP At Home' hun hlimawm tak hman chhunzawm a ni.

(Khuallian thu sawi kimchang chu a hnuaiah hian pdf-in dah a ni)

2024 R-Day DC Speech Kolasib.pdf