Vawiin chawhma dar 11.00 atang khan ni 5 awh tur Kolasib District chhung bik tana buatsaih Inter-Department Sports vawi 11-na chu New Diakkawn indoor stadium-ah neih tan a ni a; Deputy Commisisioner Pu Jitender Yadav, IAS chuan he sports hi a hawng a ni.

Hawnna thu sawiin Pu Jitender Yadav chuan, “Sawrkar hnathawkte inkara inkungkaihna tha zawk a awm theihna tura Inter-Department Sports buatsaih a ni hi a lawmawm a, kum tharah phei chuan hei aia tam zawk leh infiamna chikim zawka buatsaih turin tan i la tlang ang u” tiin sawrkar hnathawkte a fuih a, infiamnaa tel te chu an inelna turah duhsakna a hlan a ni.

Kolasib Badminton Association (KODBA) leh Inter-Department Sports Sub-Committee te huaihawt he Inter-Department Sports-ah hian Badminton-ah mi 264, Table Tennis-ah mi 116, Chess-ah mi 45, Chinese Checkers-ah mi 60, Carrom-ah mi 96 leh Draught-ah mi 39 an tel tih Organising Secretary Dr. H. Laldinmawia chuan a sawi. Hawnna inkhawm hi Organising Committee chairman Pu Z. Lalhmangaiha, Superintendent, Mizoram Excise & Narcotics chuan a kaihruai a, tluang taka infiamna hi neih chhoh a nih chuan 25th July, 2014-ah a kharna inkhawm buatsaih a ni ang.