Vawiin khan Kolasib Diakkawn Hall-ah Lab to Land Initiative chungchanga mipui zirtirna Awareness Generation Campaign neih a ni a, hei hi District Core Committee on Lab to Land buatsaih a niin Bilkhawthlir RD Block chhunga Bharat Nirman Volunteer tur zawnna leh thlanna neih zui nghal a ni.

Lab to Land Initiative awmzia leh alo irh chhuah dan, Sarkar laipuiin a dinchhuah dan leh a thiltum te Pu Lalramnghaka, Director, SIRD chuan Power Point presentation hmangin zirtirna a pe a. Lab to Land hi Central sum hmanga khua leh a mipuite changkanna tura programme duan te dik taka kalpui a nih theih nan leh a bik takin thingtlang khua te tih hmasawnna tura duan a ni, a ti. India sawrkar hian kum tinin hmasawnna tur sum 80,000 crores vel a thehchhuak ziah thin a. Heng sum thahnem tak a thehchhuah tehi a chhawrtu tur target group entir nan.. Mipui, VC leh beneficiary ten an hriatchian tawk thin loh avangin inhrilh fiah thain sawrkar laipui chuan a hria a. Chumi atan chuan Lab to Land Initiative hi a duang a. Lab to Land Initiative hnuaiah hian a tul anga mipui zirtirtu tur Bharat Nirman Volunteers te ruat an nita a ni, Pu Nghaka chuan a ti a ni.

Sawrkar hian mipui a dah lal ta hle a, anmahni dinchhuahna tura sum ruahman te a guideline anlo hriat ve a, sum hman dan pawh an hriat tul a ti a. Hei hian mipuite a ti huai ang a, sum kalkawng an hriat phawt chuan hna tha a awm ang a, hmun khata scheme pahnih thawh thuah a awm thei dawn lo bawk a ni. Bharat Nirman Volunteers (BNV) train tawhte chu an khua-a chhungkaw 10 atanga 20 zel dan anga hamthatna an dawn theih ang angte dappui tura ngaih an ni a, Deptt. leh VC te tawiawm a sum kal diklo tur vengtu tur te an ni.

Awareness Campaign hi Pi Maria CT. Zuali, Project Director, DRDA chuan a kaihruai a. Pu Lalchungnunga, BDO, Bilkhawthlir chuan inlawmna thu sawiin Thingdawl leh Khamrang VCP ten Lab to Land Initiative anlo kalpui dan te an sawi a ni. Lab to Land Initiative hi Thingdawl RD Block-ah hun engemawti atang khan lo tih tawh a ni a, tunah hian Bilkhawthlir RD Block-ah tih thar ve leh a ni.